Казанда 29-нчы номерлы маршрутта Евро-5 экология классындагы яңа газ-мотор автобуслары йөри башлады

Шәһәр пассажир транспорты паркы быел 73 заманча автобус белән тулыланды.

Фото: Денис Гордийко

(Казан шәһәре KZN.RU, 18-нче декабрь). Бүген Казанда газ-мотор ягулыгында эшли торган «НефАЗ» маркалы заманча түбән идәнле автобуслар рейска чыкты. Алар 29-нчы номерлы «Төзелеш институты - Гудованцев урамы» маршруты буенча йөриячәк. 20 яңа рейсталинг автобусы шәһәргә декабрь башында килде һәм бүгенге көнгә кадәр техник диагностика узды.

Казанга яңа 20 автобус сентябрьдә - октябрьдә китерелгән шул ук маркадагы 53 автобуска өстәмә рәвештә килде. Шул рәвешле, шәһәр пассажир транспорты автопаркы быел «Имин һәм сыйфатлы автомобиль юллары» илкүләм проекты кысаларында алынган 73 яңа автобус белән тулыланган. Татарстан башкаласы илкүләм проект кысаларында узган федераль конкурста җиңүчеләр рәтендә булды һәм бәянең 60%-ы күләмендә шәһәр паркын яңартуга федераль бюджеттан субсидия алды. Автобуслар бәясенең калган 40%-ын түләү өчен Казан транспорт предприятиеләре лизинг рәсмиләштергән, алар «Дәүләт транспорт лизинг компаниясе» гавами акционерлык җәмгыяте белән контракт төзегәннәр. Конкурста катнашуга илнең 53 субъектыннан барлыгы 60 шәһәр гариза бирде.

Бүген линиягә чыккан яңа автобуслар милли айдентика һәм «БКД» федераль проекты логотибы белән брендланган.

Гомумән алганда, шәһәрнең муниципаль транспорт предприятиеләре Казанның автобус маршрутларының 62%-ына хезмәт күрсәтә, алар елына 135 млн пассажирны йөртә. «НефАЗ» маркалы автобуслар 2007 елдан бирле Казанның транспорт предприятиеләре тарафыннан файдаланыла.

Гомумән алганда, соңгы 5 елда Казанның автобус паркы 423 яңа автобус белән тулыланды, бу 50%-тан артыкны тәшкил итә. Шәһәр пассажир транспорты автопаркын яңарту эше дәвам итәчәк, дип хәбәр итә Транспорт комитеты.