Казанда торак йортларга капиталь ремонт 76% ка ясалды

54 йортта лифтларны алыштыру буенча эшләр 97% ка диярлек башкарылган

Фото: Марат Мөгыйнов

(Казан шәһәре KZN.RU, 24 нче июль). Казанның торак фондына капиталь ремонт 76,1% ка башкарылды. Быел барлыгы 217 күпфатирлы йорт яңартылачак, шул исәптән 31 йорт – узган елларны экономияләү хисабына. 18 йортта эш комплекслы алып барылачак. Бу хакта аппарат киңәшмәсендә Торак-коммуналь хуҗалыгы комитеты рәисе Василий Лысачкин хәбәр итте.

Ремонт белән параллель рәвештә башкарылган эшләрне кабул итү бара, хәзерге вакытта актларның 29% ы диярлек тапшырылган. «Бүгенге көндә иң мөһиме – торакны капиталь ремонтлау эшләренең сыйфатын контрольдә тоту. Кирәк булса, килеп туган барлык проблемаларны хәл итүгә оператив рәвештә кушылачакбыз. Подрядчылар һәм йортларда яшәүчеләр белән даими контрольдә торабыз, бигрәк тә халыкның акчалары – программаны финанслауның иң зур чыганагы», – дип аңлатма бирде Башкарма комитет җитәкчесе Рөстәм Гафаров.

Сезонлы эшләр (җылыту системаларын, түбәләрне һәм фасадларны ремонтлау) 15 нче августка кадәр башкарылырга тиеш, ә калганнарын 1 нче ноябрьгә кадәр тәмамлау планлаштырыла. «Без сезнең белән очраштык, штаб үткәрдек, сезонлы эшләр үз вакытында тәмамлансын өчен нинди чаралар күрелде? Хәзер хәл ничек?», – дип кызыксынды Рөстәм Гафаров. «Эш артта калган йортлар (алар 30 га якын) контрольдә. Хәрәкәт бар. Объектив рәвештә соңрак башланган берничә йортны озайтачакбыз, ә калганнарында 15 нче августка кадәр эшләр тәмамланачак», – дип җавап бирде Василий Лысачкин.

Быел эшчеләр 80 йортның түбәсен, 47 бинаның фасадларын, 66 йортта үзәк җылыту системасын, 55 йортта салкын су белән тәэмин итү системасын, 25 йортта кайнар су белән тәэмин итү системасын, 54 йортта су агызу системасын һәм тагын 36 йортта электр чыбыкларын яңартачак. Шулай ук ике төзелештә янгынга каршы автоматика һәм төтен чыгару системалары урнаштырылачак, бер бинада төтен чыгару урыны ремонтланачак, биш торак йортта җылытуны һава торышы белән көйләү төеннәре урнаштырылачак.

Моннан тыш, 54 йортта 158 яңа лифт барлыкка киләчәк. Капиталь ремонт вакытында үз илебездә җитештерелгән җиһазлар урнаштырыла. Бүгенге көндә лифтларны алыштыру буенча эшләр 97% ка диярлек башкарылган, 54 дәүләт комиссиясенең 41 е үткәрелгән.

«2-4 катлы 53 йортны ремонтлау дәвам итә. Соңгы биш елда 385 аз катлы торак бина яңартылган. Мондый йортларның берсе елына уртача 200 мең сумга якын акча җыя, ә комплекслы капиталь ремонт 22 млн сумга чыга», – дип билгеләп үтте комитет рәисе. «Аз катлы йортларны ремонтлау буенча сораулар күп булды. Программаны гамәлгә ашыруның беренче елларында бу йортларга тотынмаганнар, хәзер әлеге тема көйләнгән. Соңгы биш елда 400 йортны ремонтлау – зур казаныш», – дип ассызыклады Рөстәм Гафаров.

Торак капиталь ремонтлау программасы белән «Безнең ишегалды» республика программасы синхронлаштырыла. Быел 19 йортта яшәүчеләр яңартылган йорт кына түгел, төзекләндерелгән территория дә алачак.

Капиталь ремонт тәмамланган йорт ТР Дәүләт торак фонды, ТКХ комитеты, Дәүләт торак инспекциясе, район администрациясе, идарәче компания һәм милекчеләр составындагы кабул итү комиссиясенә тапшырыла. Бүгенге көндә 49 дәүләт комиссиясе үткәрелгән. «Эшләрнең тиешенчә башкарылмавы ачыкланган очракта, шәһәр халкын төзелеш контроле хезмәтенә, торак-коммуналь хуҗалык комитетына, район администрациясенә һәм идарәче компаниягә хәбәр итүләрен сорыйм», - дип мөрәҗәгать итте Василий Лысачкин.