Казанда караклар хатын-кыздан 800 мең сумнан артык акча урлаган

Ул полиция бүлегенә мөрәҗәгать иткән һәм алдау корбаны булуы турында хәбәр иткән.

Фото: Денис Годийко

(Казан шәһәре KZN.RU, 24-нче декабрь). Казанда чираттагы телефон мошенниклыгы очрагы теркәлгән. Җинаятьчеләр хатын-кыздан 800 мең сумнан артык акча урлаган.

Берничә көн элек зыян күрүченең телефонына шалтыратканнар, «тавыш боты» үзен банк хезмәткәре дип таныштырып, телефон номерын алыштыруны раслауны сораган. Баш тарткач, «робот» зыян күрүчегә аны алга таба күрсәтмәләр өчен банк операторына күчерәчәген хәбәр иткән. Мошенник белән сөйләшү барышында зыян күрүче үзенең банк кушымтасында булган шәхси мәгълүматларын, шулай ук кесә телефонына килгән смс-хәбәрдә күрсәтелгән кодны хәбәр иткән. Кирәкле бөтен мәгълүматны алгач, аферист ханым зыян күрүчегә хәзерге вакытта аның исеменнән кредит рәсмиләштерергә маташулары хакында әйтә һәм үзен банкның куркынычсызлык хезмәткәре дип таныштырган хезмәттәше белән тоташтыра.

Ул хатын-кызга иртән банкка барырга, кредит рәсмиләштерергә һәм акчаларны куркынычсыз счетка күчерергә киңәш итә. Хатын-кыз, кредитка рәсмиләштерелгән акчаларны салдырып һәм акчаларны контактсыз ысул белән күчерү өчен яңа смартфон сатып алып, йөкләмәне үти. Нәтиҗәдә, зыян күрүче ике кредит рәсмиләштереп, мошенникларга 850 мең сумга якын акча күчергән.

«Хәзерге вакытта «Сафиуллина» полиция бүлегендә РФ Җинаять кодексының 159 маддәсенең 2 өлешендә каралган җинаять составы билгеләре буенча җинаять эше кузгатылган, – дип шәрехли Россия Эчке эшләр министрлыгының Казан шәһәре буенча идарәсе матбугат хезмәте. – Әлеге факт буенча тикшерү һәм оператив-эзләү чаралары үткәрелә».

Мошенниклык очраклары ешаю сәбәпле, Россия Эчке эшләр министрлыгы гражданнарны аеруча игътибарлы булырга чакыра. Шуны истә тотарга кирәк, карта турында мәгълүмат бирә алган бердәнбер оешма – ул аңа хезмәт күрсәтүче банк. Әгәр карта белән аны блоклау турында смс-хәбәр килсә, шунда ук банкка мөрәҗәгать итәргә кирәк. Банкның клиент хезмәте телефоны гадәттә картаның икенче ягында күрсәтелгән. Смс-хәбәрдә күрсәтелгән номерларга шалтыратып, хәбәр юллау киңәш ителми, моның өчен өстәмә түләү алынырга мөмкин.

Шулай ук укыгыз

Барлык яңалыклар