Казанда брейк-данс осталары башта әйләнү буенча дөнья рекордын куярга планлаштыра

Оештыручылар дөнья рекордын ТАССРның 100 еллыгына багышларга җыеналар.

(Казан шәһәре KZN.RU, 25-нче август). 29-нчы августта Казанда брейк-данс һәм урам сәнгате буенча Combonation X2 халыкара турнирында катнашучылар башта әйләнү буенча дөнья рекорды куярга планлаштыралар. Турнир мәйданчыкларының берсендә бер үк вакытта 100 кеше брейкингның билгеле элементын – хедспинны башкарачак. Оештыручылар дөнья рекордын ТАССРның 100 еллыгына багышларга җыеналар.

Хедспин яки башта әйләнү брейк-данста иң популяр хәрәкәтләрнең берсе булып тора, ул инде күптән дөньяның барлык брейкерларының визит карточкасы.

Combonation турнирында катнашучылар дөнья рекордына беренче тапкыр гына дәгъва кылмый – узган ел егетләр башка гадәти булмаган рекорд куйганнар: 65 биюче бер үк вакытта «Казан» гаилә үзәге түбәсендә бер кулда сикергән.

Акциядә башта әйләнә белә торган теләсә нинди физик әзерлекле кеше катнаша ала. Моның өчен биюче хедспин башкарган видеоны язып алырга һәм аны социаль челтәрләргә җибәрергә кирәк. Барлык катнашучылар да турнирның эксклюзив мерчын алачак, дип хәбәр итә ТР Яшьләр министрлыгы матбугат хезмәте.

Combonation - Россиядә брейк-данс һәм урам сәнгате буенча иң зур турнир, ул ел саен бөтен дөньядан иң яхшы артистларны җыя. Өч көн дәвамында катнашучылар тәҗрибә уртаклашалар, ярышалар. Быел ярышлар уникенче тапкыр узачак. Турнир ТР Яшьләр эшләре министрлыгы, Президент грантлары фонды һәм «Урам» иҗат берләшмәсе ярдәмендә уза.

Шулай ук укыгыз

Барлык яңалыклар