Казанда Химиклар көнен зурлап билгеләп үтәчәкләр: программада эстрада йолдызлары, химик шоу, фудкорт, мастер-класслар, фотозона һәм салют

«Казан» гаилә үзәге мәйданчыгында Барбара-бенд, Элвин Грей, Сергей Лазарев һәм DJ BubbleGum чыгыш ясаячак

Фото: Денис Гордийко

(Казан шәһәре KZN.RU, 29 нчы май, Татьяна Марюхова). Казанлыларны һәм Татарстан башкаласы кунакларын 2 нче июньдә Химиклар көнен билгеләп үтәргә чакыралар. Ул «Казан» гаилә үзәге янындагы мәйданчыкта Барбара-бенд, Элвин Грей, Сергей Лазарев һәм DJ BubbleGum артистлары катнашында узачак. Бу хакта шәһәр Мэриясендә узган эшлекле дүшәмбедә Казан Башкарма комитетының Мәдәният идарәсе башлыгы Азат Абзалов хәбәр итте.

ТР башкаласы Мэры Илсур Метшин Сибур компаниясенә Казанның мәдәни тормышының яңа бите – Химиклар көнен бәйрәм итү традициясе өчен рәхмәт белдерде.

«Химик көне аеруча зур масштабта билгеләп үтелә. Без химия һәм нефть химиясе шәһәре, безнең предприятиеләр – Казаноргсинтез, Нәфис Косметикс, Тасма-Химград, дистәләгән мең кеше һәм гаилә үз тормышларын химия белән бәйләде. Бу предприятиеләр шәһәр икътисадына, социаль һәм мәдәни тормышка зур өлеш керттеләр», - диде ул.

Шәһәр башлыгы искәрткәнчә, быел Казан сәнәгате флагманнарының берсе – «Казаноргсинтез» предприятиесе (СИБУР төркеменә керә) продукциясен чыгаруга 60 ел тула.

«Предприятие икътисадта төп роль уйнады, шулай ук югары казанышлар спортына һәм профессиональ командаларыбызга ярдәм итүдә актив спонсорлык эшчәнлеге алып бара. Бу «Рубин» да, су полосы «Синтез» да, шул исәптән балалар спорт хәрәкәте һәм зур һәвәскәрләр спорты», – дип билгеләп үтте Метшин.

Бәйрәм 18:00 сәгатьтә башлана, программада химик шоу, шулай ук интро-акробатик шоу булачак. Мәйданчыкта фудкорт, аквагрим һәм беләзекләр ясау буенча мастер-класслар, фотозона һәм фото-будка эшләячәк.

Бәйрәм салют белән тәмамланачак, дип җиткерде Абзалов.