Казанда БРИКС саммитына яктырту челтәрләрен ремонтлаячаклар

Эшләрне 24 нче октябрьгә кадәр тәмамлау планлаштырыла

Фото: Марат Мөгыйнов

Татарстан башкаласында БРИКС саммитына 20 шәһәр участогында яктырту челтәрләрен ремонтлаячаклар. Эшләрне 24 нче октябрьгә кадәр тәмамлау планлаштырыла, аларны үткәрүгә республика бюджетыннан 551 млн сум акча бүлеп биреләчәк. Бу хакта Дәүләт сатып алулары сайтында хәбәр ителә.

Участоклар исемлегенә түбәндәгеләр кертелгән: Универсиада проспектындагы Пушкин урамына кадәр борылыш элмәге; Кремль, Театр, Чернышевский урамнары, Батурин урамына кадәр Карл Маркс урамы; Мәскәү, Чистай (Ямашевтан Мусинга кадәр), Лесгафт, Ершов, Әмирхан, Декабристлар, Овражная, Профсоюз, Уң як Болак һәм Сул як Болак урамнары; Ирек мәйданы; «Миллениум» күперенең уң ягы; филармония һәм Фестиваль скверлары; «Ак Барс».

Кунак маршрутларында урнашкан биналардагы яктырткычлар, терәкләр һәм лампалар алыштырылачак. Подрядчы шулай ук яктырту белән идарә итүнең яңа щитларын урнаштырачак һәм кабель линияләрен үткәрәчәк. Төп этап тәмамлангач, юл япмасы, билгеләр һәм тротуар плиткалары яңартылачак.

Элегрәк хәбәр ителгәнчә, БРИКС саммитына Казанның Вахитов һәм Идел буе районнарында 31 йорт фасады ремонтланачак, шуларның алтысы – мәдәни мирас объектлары. Ә «Казан» халыкара аэропортында яңа перрон төзеләчәк, анда киң фюзеляжлы 33 самолет сыя алачак.

Шулай ук укыгыз

Барлык яңалыклар