Казанда ел башыннан 67 кг наркотик законсыз әйләнештән алынган

Наркотиклар китерүнең 22 каналы ябылган

Фото: Денис Гордийко

(Казан шәһәре KZN.RU, 4 нче декабрь, Диана Жиленкова). Быел Казанда полиция хезмәткәрләре законсыз әйләнештән 67 килограмм наркотик, психотроп һәм көчле тәэсир итүче матдәләр алды. Җинаять җаваплылыгына 800 кеше, административ җаваплылыкка өч меңнән артык кеше җәлеп ителгән. Бу хакта Башкарма комитетның эшлекле дүшәмбесендә Россия Эчке эшләр министрлыгының Казан буенча идарәсе башлыгы урынбасары Илнур Хәялиев хәбәр итте.

Аның сүзләренчә, 22 наркотиклар җибәрү каналы, шул исәптән шәһәр территориясендә тарату өчен билгеләнгән җиде канал һәм 15 транзит пункт ябылган.

«Республика буенча Эчке эшләр министрлыгы коллегалары белән берлектә үткәрелгән оператив-эзләү чаралары нәтиҗәсендә Казанның ике кешесе тоткарланды, аларның яшәү урынында 2 килограммнан артык синтетик наркотик матдәсе табылды һәм тартып алынды», – дип сөйләде Илнур Хәялиев.

Шулай ук алкоголь продукциясенең легаль булмаган әйләнешенә каршы тору буенча чаралар үткәрелә. Ел башыннан полиция хезмәткәрләре сәүдә объектларын 1,7 меңләп тикшерү оештырган, нәтиҗәдә 262 административ беркетмә төзелгән.

«Шәһәрнең гараж кооперативларының берсендә уздырылган оператив чаралар барышында бер гражданнан тиешле документларсыз 4 мең литр күләмендә спиртлы продукция тартып алынды. Алынган продукция экспертизага җибәрелде», - дип уртаклашты Россия Эчке эшләр министрлыгының ТР башкаласы буенча урынбасары.

Барлыгы 11 җинаять буенча җинаять эшләре кузгатылган. Законсыз әйләнештән 12,5 мең литрдан артык алкоголь продукциясе алынган.