Казанда тагын ике җәмәгать транспорты маршруты кондукторсыз системага күчерелде

Барлыгы 93 трамвай һәм троллейбусны стационар валидаторлар белән җиһазландыру планлаштырыла

Фото: Денис Гордийко

(Казан шәһәре KZN.RU, 20 нче сентябрь). Бүгеннән Казанда 2 нче маршрут трамвайлары һәм 13 нче маршрут троллейбуслары кондукторларсыз йөри башлады. Хәзер пассажирлар юл йөрү өчен стационар валидаторлар аша түли алачак.

Түләүне раслау өчен пассажирга җайланмага транспорт яки банк картасын куярга һәм башкарылган түләү турында мәгълүматны көтәргә кирәк.

Бүгенге көндә линиягә кондукторларсыз 18 трамвай (2 нче, 4 нче маршрутлар) һәм 27 троллейбус (2 нче, 6 нчы, 13 нче маршрутлар) чыга.

Барлыгы 93 транспорт берәмлеген валидаторлар белән җиһазландыру планлаштырыла: 48 трамвай һәм 45 троллейбус. Якын көннәрдә юл йөрү өчен түләүнең кондукторсыз системасына 7 нче (11 троллейбус), 9 нчы (14 троллейбус) троллейбус маршрутлары һәм 3 нче (дүрт трамвай), 6 нчы (алты трамвай) трамвай маршрутлары күчереләчәк.

Линияләрдә контроль-ревизия бүлегенең мобиль бригадалары һәм «Метроэлектротранс» МУП депосының административ персоналы эшли. Алар пассажирларга стационар валидаторлар аша юл өчен түләргә булышалар.

Шулай ук укыгыз

Барлык яңалыклар