Казанда үсеш үзенчәлекләре булган балалар өчен «Чаңгыда сәламәтлек көне» акциясе старт алды

Горки-Әмәт урманында балалар өчен мастер-класслар һәм ярышлар узачак.

Фото: Совет районы администрациясе

(Казан шәһәре KZN.RU, 24-нче декабрь). Казанның Горки-Әмәт урманында кичә сәламәтлек мөмкинлекләре чикләнгән балалар өчен «Чаңгыда сәламәтлек көне» кышкы акциясе старт алды. Укучылар чаңгыда шуа һәм профессиональ чаңгычылар белән мастер-классларда катнаша алачак.

«Мин бүген беренче тапкыр чаңгыга басып карадым. Бик куркыныч булса да, миңа зур булмаган калкулыклардан шуу бик ошады. Минем апамның чаңгысы бар, хәзер аннан алып торып, чаңгыда шуачакмын», - дип сөйләде акциядә катнашучы Анастасия Нестерова.

Акция зур ярыш көне белән тәмамланачак: укучылар чаңгы ярышларында катнашачаклар, ярышлар нәтиҗәләре буенча иң яхшыларны кубоклар һәм призлар белән бүләкләячәкләр. Ярышлар азагында бәйрәм программасы һәм чәй эчү оештырылачак.

Акциянең оештыручылары булып Казанның Совет районы администрациясе һәм ТР башкаласының Чаңгы узышлары һәм биатлоны федерациясе тора. «Акция узган өч ел эчендә катнашучыларда алга китеш сизелә башлады - күпләр тагын да ышанычлырак шуа башлады. Моннан тыш, катнашырга теләүче балаларның саны елдан-ел арта бара», - дип уртаклашты федерация рәисе урынбасары Рөстәм Сафин.

Шулай ук укыгыз

Барлык яңалыклар