Казанда «Киләчәк уеннары» вакытында алкоголь сатуны өлешчә тыячаклар

Чикләүләр ярышларны кабул итәчәк спорт объектлары янында урнашкан сәүдә нокталарына кагылачак

Фото: Денис Гордийко

Казанда «Киләчәк уеннары» халыкара турниры уздырылган көннәрдә спиртлы эчемлекләр сатуны өлешчә тыячаклар. Тыю ярышларны кабул итәчәк спорт объектларына якын территорияләрдәге сәүдә нокталары өчен 8:00 дән 17:00 гә кадәр гамәлдә булачак. Тиешле карарга ТР премьер-министры Алексей Песошин кул куйды.

«Тренировкалар һәм ярышлар уздырылган көннәрдә спорт объектларына якын территорияләрдә урнашкан сәүдә объектларында 8:00 сәгатьтән 17:00 сәгатькә кадәр алкогольле продукцияне ваклап сату рөхсәт ителми», – диелә документта.

Карар нигезендә алкоголь сатуны тыю түбәндәге спорт объектлары янында гамәлдә булачак:

19-23 нче февральгә кадәр – «Татнефть Арена» стадионы янында;

20 нче февральдән 3 нче мартка кадәр – Казан теннис академиясе янында;

22-23 нче февральдә – «Ак Барс» көрәш сарае янында;

24-26 нчы февральдә – Казан циркы янында;

21-26 нчы февральдә һәм 28 нче февральдән 2 нче мартка кадәр – Бәшир Рәмиев исемендәге ИТ-парк янында;

27-29 нчы февральдә – «Хезмәт резервлары» стадионы янында;

19-20 нче февральдә – «Зилант» боз сарае һәм «Искәндәр» манежы янында;

22 нче, 28 нче һәм 29 нчы февральдә – «Урам» яшьләр экстрим-паркы янында.