Казанда 33 мең кв.м мәйданлы ишегаллары комплексы төзекләндерелде

Территориядә асфальт алмаштырылган, балалар һәм спорт мәйданчыклары җиһазландырылган, 250 дән артык агач һәм куак утыртылган

Фото: Денис Гордийко

(Казан шәһәре KZN.RU, 1 нче июнь). Казанның Дәрвишләр бистәсендә гомуми мәйданы 33 мең кв.м булган ишегаллары комплексы төзекләндерелде. Территория 12 йортны берләштерә, аларда меңнән артык кеше яши. Бүген яңартылган ишегалларында ТР Рәисе Рөстәм Миңнеханов һәм Казан Мэры Илсур Метшин булачак.

Совет, Правда, Халезов урамнары буенча урнашкан ишегалларында асфальт алмаштырыла, ут баганалары, эскәмияләр, балалар һәм спорт мәйданчыклары урнаштырыла. Өстәмә рәвештә биредә 250 дән артык агач һәм куак утыртылган.

Ремонт эшләре шулай ук торак йортларны да үз эченә ала. Шулай итеп, идарәче компания фасадларны, керү төркемнәрен һәм түбәләрне ремонтлаган. «Казэнерго» АҖ 14 җылылык камерасын реконструкцияли һәм җылылык трассасының 80 погон метр торбасын алыштыра, «Челтәрле компания» АҖ электр белән тәэмин итү челтәрләрен җир асты коммуникацияләренә күчерә.

Очрашу барышында Миңнеханов һәм Метшин «КазанДа күңелле җәй» проектына старт бирәчәкләр, аның кысаларында 4 меңнән артык бала үз кызыксынулары буенча шөгыль таба алачак. «Хобби бокс» республикада беренче күчмә яшүсмерләр клубы эш көннәрендә шәһәрнең ерак районнарында бушлай дәресләр үткәрәчәк. Монда балалар мастер-классларга йөри, яңа күнекмәләр үзләштерә яки интеллектуаль һәм өстәл уеннары уйный алачак.

Шуннан соң ТР Рәисе һәм Казан Мэры «Казан – Бәхетле балачак шәһәре» фестивале атмосферасын тоячаклар. Биредә «Һөнәрләр шәһәре» станциясе эшләячәк, анда балалар үзләрен галим, янгын сүндерүче, ЮХИДИ хезмәткәре, табиб, спортчы һәм фермер ролендә сынап караячак. Фестивальдә «Беренчеләр хәрәкәте» активистлары үз эшчәнлекләре турында сөйләячәк, ә «Яшәү яме» проекты катнашучылары гимнастика үткәрәчәк. Шулай ук бәйрәм кунаклары «Тыңлыйбыз» проекты кысаларында психолог белән киңәшләшә һәм «Лапа дружбы» проекты буенча этләрне өйрәтергә өйрәнә алачак.

Исегезгә төшерәбез, «Безнең ишегалды» программасы 2020 елда старт алды. Өч ел эчендә программа буенча 1356 йорт төзекләндерелгән, яхшыртулар 300 меңнән артык кешегә кагылган. Быел Казанда 530 мең кв.м мәйданлы 473 ишегалды территориясе төзекләндереләчәк. Хәзерге вакытта 180 ишегалдында эшләр алып барыла. Яхшыртулар 100 мең шәһәр кешесенә кагылачак.

Шулай ук укыгыз

Барлык яңалыклар