Казанда кан басымын үлчи торган тонометрларның төзеклеген бушлай тикшерәчәкләр

Автомат, ярымавтомат, механик һәм терекөмешле җайланмаларны китерергә мөмкин булачак

Фото: Марат Мөгыйнов

Казанлылар 7-9 нчы апрельдә тонометрларын бушлай тикшертә алачак. «ТР Стандартлаштыру, метрология һәм сынаулар үткәрү буенча дәүләт төбәк үзәге» ФБУ метрологлары җайланманың күрсәтмәләре турында нәтиҗә ясаячак, шулай ук төзексезлекне бетерү буенча киңәшләр бирәчәк.

Тикшерүгә автомат, ярымавтомат, механик һәм терекөмешле җайланмаларны китерергә мөмкин, әмма беләзек тонометрлары кабул ителмәячәк, дип ассызыкладылар оешмада.

Гражданнарны Журналистлар урамы, 24 адресы буенча ТР Стандартлаштыру, метрология һәм сынаулар үткәрү буенча дәүләт төбәк үзәгендә 9:00 сәгатьтән 17:00 сәгатькә кадәр көтәчәкләр. Барлык кирәкле мәгълүматны +7(843)233-18-02 телефоны буенча белергә мөмкин.

Чараның максаты – халыкка, йөрәк-кан тамырлары авыруларын кисәтү өчен, көнкүреш тонометрлары күрсәткечләренең төгәллеген даими тикшерү мөһимлеген җиткерү.

Акция Техник көйләү һәм метрология буенча федераль агентлык (Росстандарт), шулай ук ведомство карамагындагы учреждениеләр тарафыннан оештырыла. Быел чара беренче тапкыр «Сәламәт бул» бөтенроссия акциясе кысаларында уза.

Шулай ук укыгыз

Барлык яңалыклар