Казанда 29 нчы июльдә «Алтын тәлинкә» кинопремиясе җиңүчеләрен бүләкләячәкләр

Кичә Татарстан режиссеры Илшат Рәхимбайның «Микулай» тулы метражлы фильмын күрсәтү белән тәмамланачак

Фото: «Кино вакыты» дирекциясенең матбугат хезмәте

(Казан шәһәре KZN.RU, 25 нче июль). 29 нчы июльдә, шимбә көнне, Бәшир Рәмиев исемендәге ИТ-паркта кинематография өлкәсендә III төбәкара «Алтын тәлинкә» премиясе узачак. Бүләкләү тантанасында эксперт һәм тамашачылар турларына йомгак ясалачак. Гомуми приз фонды 2 млн 150 мең сум тәшкил итәчәк.

Акчалата бүләкләр «Милли телдәге иң яхшы тулы метражлы уен фильмы», «Иң яхшы режиссер», «Кадрлар артыннан кадрлар», «Дебют», «Тамашачылар симпатиясе» һәм башка номинацияләрдә уйнатылачак. Катнашучыларны шулай ук махсус һәм партнерлык призлары көтә.

Оештыручылар хәбәр иткәнчә, кинопремиянең яңа сезонында катнашу өчен Россиянең 30 дан артык төбәгеннән 230 дан артык гариза килгән. Илнең 19 субъектыннан 57 фильм лонг-листка эләккән, ә 35 проект – шорт-листка.

Программага экспертлар, партнерлар һәм кинопремиядә катнашучылар катнашында төбәк киносын таныту буенча кейс-тур кертелгән. Кичә Татарстан режиссеры Илшат Рәхимбайның «Микулай» тулы метражлы фильмын күрсәтү белән тәмамланачак. Проект «Кино вакыты» беренче питчингында җиңде һәм «Иң яхшы уен кинопроекты» номинациясендә җиңү яулады.

Кинокартинаны тамашачыга режиссер үзе тәкъдим итәчәк. Аны караганнан соң клиник психолог Алия Булатова белән эш турында фикер алышу планлаштырыла. Чара 20:00 сәгатьтә башлана. Кичәгә кушылу өчен сылтама буенча теркәлергә кирәк. Фильм 18 яшьтән өлкәнрәк тамашачылар өчен билгеләнгән.

Кунакларны эшлекле программага һәм бүләкләү тантанасына чакыру билетлары буенча кертәчәкләр. Чараның тулы программасы белән сылтама буенча танышырга мөмкин.

Кинопроектларга ярдәм итү һәм кино вакыты фестивальләрен оештыру буенча дирекция «Алтын тәлинкә» төбәкара кинопремиясе авторы һәм инициаторы булып тора. Проект РФ Президентының Мәдәни инициативалар фонды финанс ярдәме белән гамәлгә ашырыла.

Шулай ук укыгыз

Барлык яңалыклар