Казанга гастрольләр белән Александрин театры киләчәк

Тамашачыларга Николай Мартонның «Вертинский. Русский Пьеро» һәм Теодорос Терзопулосның «Маузер» театральләштерелгән ораториясен тәкъдим итәчәкләр.

Фото: Денис Гордийко

(Казан шәһәре KZN.RU, 18 нче февраль). 2 нче һәм 3 нче апрельдә Галиәсгар Камал исемендәге Татар дәүләт академия театрында Александрин театры (Санкт-Петербург) гастрольләре узачак. Зур һәм кече сәхнәләрдә соңгы еллардагы 2 премьера тәкъдим ителәчәк: Россиянең халык артисты Николай Мартонның «Вертинский. Русский Пьеро» һәм Хайнер Мюллер пьесасы буенча режиссер Теодорос Терзопулосның «Маузер» театральләштерелгән ораториясе.

2 нче апрельдә 19:00 сәгатьтә «Вертинский. Русский Пьеро» спектакль-концерты куелышы булачак, ул бөек рус актеры, шагыйрь һәм шансонье Александр Вертинскийның музыкаль новелламасы буенча әзерләнгән. Аның җырларын һәм шигырьләрен башкару, тамашачыларга әсәрне бүгенге көн күзлегеннән тәкъдим итү Александрин сәхнәсе корифее Николай Мартонның күптәнге иҗади хыялы була.

3 нче апрельдә 19:00 сәгатьтә Казан тамашачысына «Маузер» театральләштерелгән ораториясен күрсәтәчәкләр. Танылган Греция остасы, Европа театры лидерларының берсе булган Теодорос Терзопулосның спектакле – Россиядә пьесаның беренче тулы куелышы, дип хәбәр итә Камал театрының матбугат хезмәте.

Шулай ук укыгыз

Барлык яңалыклар