Казанның Горки-Әмәт урманында «Бәхет белән узышу» велоузышы узачак

Яшь велосипедчыларга ярдәм итүнең иң яхшы төркеме өчен аерым бүләк каралган.

Фото: Денис Гордийко

(Казан шәһәре KZN.RU, 25-нче май). 28-нче май көнне Казанның Горки-Әмәт урманында балалар өчен махсус «Бәхет белән узышу» исемле үзенчәлекле V юбилей велоузышы узачак. Яшь катнашучыларга махсус өч тәгәрмәчле велосипедларда 380 метр дистанцияне узарга туры киләчәк.

Чара программасында – концерт, тәмле ризыклар, шулай ук велоузыш җиңүчеләрен бүләкләү тантанасы. Быел иң яхшы ярдәм төркемен аерым билгеләп үтәчәкләр.

KZN.RU порталына велоузышны уздыручы «Альпари» хәйрия фонды директоры Наталья Гыйлаҗева хәбәр иткәнчә, бүгенге көндә инде йөздән артык катнашучы теркәлгән. «Соңгы шундый велозаездны без 2019 елда пандемиягә кадәр үткәргән идек. Ул вакытта анда сәламәтлек мөмкинлекләре чикләнгән 150-дән артык бала катнашты, – дип сөйләде Н.Гыйләҗева. – Жюри булмаячак, чөнки күпчелек дәрәҗәдә бу балалар бәйрәме. Без иң актив ярдәм төркемен истәлекле дипломнар һәм символик бүләкләр белән билгеләп үтәчәкбез».

Балалар терәк-хәрәкәт аппараты авырулары булган балаларның үзенчәлекләрен исәпкә алып эшләнгән махсус велосипедларда узышачак. Алар балаларның уңайлылыгын һәм куркынычсызлыгын тәэмин итү өчен проектланган.

Велоузыш 10:00 сәгатьтә башланачак. Велосипедта катнашу өчен алдан сылтама буенча теркәлергә кирәк.

Исегезгә төшерәбез, Казан паркларында һәм скверларында махсуслаштырылган велосипедларны бушлай прокатка алу пунктлары эшли башлады – алар Горки-Әмәт урманында, Җиңү паркларында һәм «Сосновая роща» паркларында ачылды.

Шулай ук укыгыз

Барлык яңалыклар