2025 елда төзекләндереләчәк җәмәгать киңлекләре һәм ишегаллары өчен тавыш бирүдә 84 мең казанлы катнашкан

Сораштыру «Ачык Татарстан» порталында 30 нчы апрельгә кадәр дәвам итәчәк

Фото: Денис Гордийко

Бүгенге көндә 84 мең шәһәрле Казанда 2025 елда төзекләндереләчәк җәмәгать киңлекләре һәм ишегаллары өчен тавыш бирүдә катнашкан. Бу хакта ТР башкаласы Башкарма комитетының тышкы төзекләндерү комитетында хәбәр иттеләр. Сораштыру 30 нчы апрельгә кадәр «Ачык Татарстан» порталында дәвам итәчәк, шул ук вакытта ТР дәүләт хезмәтләре порталында авторизация узарга яки «ТР хезмәтләре» мобиль кушымтасыннан файдаланырга мөмкин. Анда 14 яшьтән башлап теләгән һәркем катнаша ала.

Быел парклар һәм скверлар исемлегенә Казанның 24 объекты кергән. Алар арасында – Зур Акчарлак күле территориясе (икенче чират), Түбән Кабан күле яр буе (өченче чират), филармония янындагы сквер, «Волжские просторы» паркы, «Тәбриз» скверы һәм башкалар. Объектларның тулы исемлеге белән сылтама буенча танышырга була.

Моннан тыш, татарстанлыларның «Безнең ишегалды» республика программасы буенча өстенлекле тәртиптә төзекләндереләчәк 200 йорт территориясен сайлап алу мөмкинлеге бар. Казанда күпфатирлы 452 йортның ишегалларын яңарту күздә тотыла.

Исегезгә төшерәбез, узган елгы тавыш бирүдә казанлыларның актив катнашуы нәтиҗәсендә Серов урамындагы бульварны төзекләндерү (эшләрнең икенче чираты) бу сезонда дәвам итәчәк. Анда сәламәтлеге ягыннан мөмкинлекләре чикле кешеләр өчен сенсорлы бакча барлыкка киләчәк. Шулай ук Зур Акчарлак күле территориясендә эшләр башлана – әлеге объектта керү төркеме төзекләндереләчәк һәм кафе белән павильон урнаштырылачак.

Узган ел җәмәгать киңлекләре өчен тавыш бирүдә 363 мең 258 татарстанлы катнашкан, бу, алдагы ел белән чагыштырганда, 75% ка күбрәк. Сораштыруда республиканың 267 территориясе тәкъдим ителде, шуларның 30 ы Казанда урнашкан. Үз тавышларын шәһәрнең 112 меңгә якын кешесе биргән.

Шулай ук укыгыз

Барлык яңалыклар