«Аксенов-фест» фестивалендә Павел Басинский, Дмитрий Воденников һәм башка танылган әдәбиятчылар катнашачак

Чаралар 20-22 нче сентябрь көннәрендә узачак

Фото: Денис Гордийко

(Казан шәһәре KZN.RU, 18 нче сентябрь). «Аксенов-фест» фестивале 20-22 нче сентябрьдә узачак. Казанда ул 16 нчы тапкыр үткәрелә һәм традицион рәвештә язучы Василий Аксеновның тормышына һәм иҗатына багышлана. Чаралар берничә урында узачак. Төп мәйданчык В.Аксеновның музей йорты булачак, лекцияләр һәм дискуссияләр ТР Милли китапханәсендә, шулай ук яңартылган «Сандугач» китапханәсендә һәм Аксенов бакчасында узачак. Фестивальнең кунаклары Россиянең халык артисты Лариса Долина, язучы һәм әдәбият белгече Павел Басинский, шагыйрә Екатерина Барбаняга, эссечы Дмитрий Воденников, шулай ук «Литературная газета»ның баш мөхәррире Максим Замшев һәм башкалар булачак.

«Берникадәр вакыт элек без Аксенов йортындагы камера чараларына керә алмаган казанлылардан билгеле бер кире элемтә алдык. Шуңа күрә без мәйданчыклар санын арттыру турында карар кабул иттек. Быел алар тагын да артты: Милли китапханә һәм Мәүлетов урамында урнашкан «Сандугач» реконструкцияләнгән китапханәсе. Халык күпләп яшәгән читтәгерәк районнар да мондый чараларда канаша ала», – дип сөйләде Башкарма комитет җитәкчесе Рөстәм Гафаров.

«Василий Аксенов васыяте буенча уздырыла торган фестиваль традицион рәвештә заманча әдәбиятка, яңа язу тенденцияләренә һәм яшь авторларга багышланган, быел яшьләр һәм әдәбият белән мавыгучылар өчен очрашу урыны булачак», – дип уртаклашты Казан Башкарма комитетының Мәдәният идарәсе башлыгы Азат Абзалов.

Фестивальнең ачылышы 20нче сентябрьдә 13:00 сәгатьтә Василий Аксеновның музей йортында узачак. «Казан» журналы архивларыннан ТР башкаласы тарихы турында «Сирәк кадр» фотокүргәзмәсе тәкъдим ителәчәк. Аннан соң язучы Александр Кабаков әсәрләре мотивлары буенча «Барысы да төзәтелә, яки Мәскәү әкиятләре» иҗади очрашуы узачак.

Алга таба фестиваль «Сандугач» китапханәсендә дәвам итәчәк, чара 15:30 сәгатькә планлаштырылган. Язучы Екатерина Златорунская һәм шагыйрь Сергей Скуратовский «Яңа буын» әдәби проекты кысаларында очрашу үткәрәчәкләр һәм фестивальдә катнашучылар белән әңгәмә корачаклар. «Казань Арнольда Бренинга – аптекаря, музыканта и фотографа» күргәзмәсе Милли китапханәдә ачылачак, анда язучылар Денис Осокин, Павел Басинский, Екатерина Барбаняга чыгыш ясаячак.

Фестивальнең беренче көне музыкант Анна Королева, язучылар Дмитрий Воденников, Денис Осокин, журналист Альбина Әпсәләмовалардан джаз һәм шигърият кичәсе белән тәмамланачак, дип сөйләде Азат Абзалов.

Икенче көнне Милли китапханәдә заманча драматургия турында фикер алышулар булачак, анда язучылар Дмитрий Данилов, Екатерина Златорунская, Денис Осокин катнашачак. Максим Замшевның «Вольнодумцы» китабының презентациясе төп темаларның берсе булачак. Ә Екатерина Барбаняга, Павел Басинский, Дмитрий Воденников «Блогинг, сторителлинг – путь в профессию или путь в никуда?» дигән темага лекция үткәрәчәк.

Шулай ук «Аксенов-фест»та катнашучылар шигъриятне, Аксенов прозасыннан өзекләрне 16:00 сәгатьтә Аксенов бакчасында джаз астында ишетә алачак. Көннең соңгы чарасы кабат ТР Милли китапханәсендә узачак – Павел Басинский белән очрашу.

Соңгы көн дә төрле вакыйгалар белән тулы булачак. Әдәби чаралар «Сандугач»та һәм Милли китапханәдә иртән оештырылачак. Казан Ратушасында 15:00 сәгатьтә төп вакыйга – «Йолдызлы билет» премиясен тапшыру булачак, анда фестиваль кунаклары, Россия һәм Татарстан мәдәният эшлеклеләре, шулай ук махсус программа белән җырчы Лариса Долина катнашачак.

Фестиваль чараларына керү сайтта алдан теркәлү һәм кайнар линия телефоны буенча бушлай: +7(843)238-69-96.