Быел Казанның Авиатөзелеш һәм Яңа Савин районнарында 34 юл объекты ремонтланачак

Узган ел 19 урам, шул исәптән Гагарин, Чуйков, Голубятников һәм Белинский урамнары төзекләндерелгән.

Фото: Денис Гордийко

(Казан шәһәре KZN.RU, 14 нче март, Алинә Бережная). 2021 елда Казанның Авиатөзелеш һәм Яңа Савин районнарында 12 км озынлыкта 19 урам ремонтланган. Юл төзелеше һәм капиталь ремонт, төзекләндерү өлкәсендәге нәтиҗәләр һәм планнар турында бүгенге эшлекле дүшәмбе вакытында Казан Мэры Илсур Метшинга Авиатөзелеш һәм Яңа Савин районнары администрациясе башлыгы Фәнис Нурмөхәммәтов җиткерде.

Узган ел районнарда төп дүрт урам – Гагарин, Чуйков, Голубятников һәм Белинский урамнары ремонтланган, юл-транспорт һәлакәтләре күп була торган 14 участок бетерелгән. Юл эшләре «Имин сыйфатлы юллар» илкүләм проекты буенча алып барылган.

Поселокларда да юл инфраструктурасына ремонт ясалган. Әйтик, Дружба поселогында Ключище урамы, Яңа Каравайда Бестужев урамы, Борисоглебский поселогында Шоссе урамында ремонт ясалган, тротуар салынган. Шулай ук «Строитель-1» коммерцияле булмаган бакчачылык ширкәтенә юл төзелде, 8 квартал эчендәге юл, 3 социаль учреждениегә керү юллары ремонтланды, дип хәбәр итте Фәнис Нурмөхәммәтов.

Районнарда юлларны ремонтлау белән беррәттән ишегалларын да төзекләндерәләр. Әйтик, «Безнең ишегалды» республика программасы буенча узган ел 63 ишегалды төзекләндерелгән, быел 54 йорт яны территориясендә комплекслы эшләр башкару планлаштырыла.

Төзекләндерүгә үз йортлары янында чәчәк түтәлләре һәм чәчәк бакчалары ясаучы халык актив ярдәм күрсәтә. «Ел саен компенсация белән утырту кысаларында районнарда 1,5 меңгә якын агач утыртыла, газоннар һәм чәчәк түтәлләре төзекләндерелә», – дип сөйләде Фәнис Нурмөхәммәтов. Шулай ук 27 экологик акция үткәрелгән, шул исәптән Казансу, Коры елга ярлары, Зәңгәр күлләр һәм Чуйков урамындагы күлләр чистартылган.

Район башлыгы узган ел Яңа Савин районында яңа иҗтимагый киңлек барлыкка килүен искәртте – Кече Акчарлак күле территориясе төзекләндерелгән. Ә быел «Ак Барс Арена» стадионы янында «Спорт» паркы төзелешен башлау планлаштырыла. Проект хайваннар һәм үсемлекләрнең уникаль төрләрен, шулай ук табигый ландшафтны саклау белән тормышка ашырылачак.