В целях анализа посещаемости и улучшения работы портала мы используем сервис «Яндекс.Метрика». Оставаясь на нашем портале, Вы выражаете свое согласие на обработку Ваших данных указанным сервисом.
Яңалыклар
21.11.2025, 11:13
Бу елны менталь тайпылышлары булган 112 казанлы шәһәрнең төрле өлкәләренә эшкә урнаштырылган
«Игелекле Казан» ярдәме белән яшьләр стажировка үтә һәм остаханәләрдә, кибетләрдә, кафеларда, торак-коммуналь хуҗалык объектларында эшли башлый
«Игелекле Казан» автоном коммерцияле булмаган оешмасы фотосы
Ел башыннан бирле Казанда менталь тайпылышлары булган 112 шәһәр кешесе уңышлы эшкә урнаштырылган. Яшьләр төрле юнәлешләрдә: остаханәләрдә, азык-төлек кибетләрендә, кафеларда, туклану департаментында, торак-коммуналь хуҗалык объектларында эшлиләр. «Игелекле Казан» автоном коммерцияле булмаган оешмасы үз карамагындагы яшьләргә социаль тирәлеккә җайлашырга, күңелгә ятышлы һөнәр эзләргә һәм эшкә урнашырга һәрвакыт ярдәм итә. 2025 елның җәеннән оешма грант ярдәмендә стажировкаларны глобаль форматта уздыру проектын гамәлгә ашыра. Бүгенге көндә әлеге проектта менталь тайпылышлары булган 27 кеше катнаша.
Әйтик, күптән түгел «Игелекле Казан»ның берничә укучысы Казан кунакханәләренең берсендә стажировка узу мөмкинлегенә ия булган. Хезмәткә керешкәнче танышу очрашуы уздырылган, анда балалар үзләрен хаускипер, официант һәм бэллбой буларак сынап караган. Нәтиҗәдә бер кеше хаус-киппинг департаментына стажировка узу өчен рәсмиләштерелгән, бер яшь кешене шул ук юнәлеш буенча билгеләү күздә тотыла һәм тагын икесе аш-су блогында стажировка узачак.
Менталь үзенчәлекләре булган кешеләрне хезмәт эшчәнлегенә яраклаштыру процессы гади генә түгел: стажировка узу мөмкинлеге бирергә сәләтле бизнес вәкилләре белән эш алып барырга, эшкә өйрәтүче тьютор табарга һәм балаларның мәнфәгатьләрен өйрәнергә кирәк.
Эш яшүсмерне сынаудан һәм аның һөнәри портретын формалаштырудан башлана, аның нигезендә һөнәри эшчәнлекнең конкрет төре элементларын модельләштерә торган һөнәри сынау маршруты төзелә. Бу этапта укучы менталь үзенчәлекләре булган башлангыч, танышу чараларында: уеннарда, тренингларда, экскурсияләрдә һәм остаханәләрдә катнаша. Мондый якын килү аркасында кешегә үзенең кем булырга теләвен яки теләмәвен аңлау җиңелрәк.
«Менталь тайпылышлары булган кешеләрнең уңышлы эшләве өчен атмосфера һәм ул эшләячәк коллектив мөһим роль уйный. Мондый төр кешеләргә өлкәннәр хезмәт коллективында үзара хезмәттәшлек тәҗрибәсе туплау мөһим. Нәрсә әйтсәң дә, эш бик четерекле! Сине яңа гаиләгә кабул итәрләрме, син кагыйдәләргә буйсынырга әзерме, остазыңа йөк булмыйча, аның ярдәмен тоеп эшләргә ризамы-юкмы икәнен аңлау өчен, әлбәттә, сынап карарга кирәк», - дип аңлатты «Игелекле Казан» коммерцияле булмаган автоном оешмасы директоры Татьяна Мерзлякова.
Һөнәри сынаулар ял итеп йөрүдән һәм ял чараларыннан аерыла – сынау вакытында яшьләр эш серләренә төшенә, профессионаллар белән аралаша һәм эш бирүчеләр белән таныша. Шуннан соң, Татьяна Мерзлякова әйткәнчә, «сак оптимизм белән» үзләрен билгеле бер эшчәнлектә сынап карый башлыйлар.
«Без уңышсызлыкларны шулай ук бергәләп анализлыйбыз. Тьюторлар һәм белгечләрдән тыш, бу эштә ата-ананың катнашуы да бик мөһим. Үзеннән-үзе берни дә барып чыкмаячак. Бу зур командалы проект хезмәте, анда һәркемнең һәм, аерым алганда, эшкә өйрәтүче тьюторның роле бик зур», - дип шәрехләде «Игелекле Казан» коммерцияле булмаган автоном оешмасы директоры.
Эшкә өйрәтүче тьютор (джоб-тьютор) – ул инклюзив эшкә урнаштыруда иң кирәкле, әһәмиятле катнашучыларның берсе. Әлеге зат менталь үзенчәлекләре булган кешеләрне акрынлап һәм уңай гына эш атмосферасына алып керергә ярдәм итә, шулай ук алар белән бергә эшли торган сәламәт хезмәттәшләренә хезмәттәшлек итү өчен инструментлар тәкъдим итә. Джоб-тьютор ул волонтер да, ата-ана да була алмый. Аның чын белгеч булуы мөһим. Бу эштә яшүсмерләрнең ата-анасыннан һәм башка якын кешеләреннән аерылуы әһәмиятле.
«Игелекле Казан» карамагындагылар төрле урыннарда: техникумнарда, балта эше һәм тегү остаханәләрендә, Серов бульварындагы «СИБУР» экопавильонында, зооботаника бакчасында, азык-төлек кибетләре челтәрендә һәм башка урыннарда практика узалар. Кайвакыт балалар «Игелекле Казан»ның үз проектларында, мәсәлән, инклюзив типографиядә стажировка үтәләр.
Бүгенге көндә менталь тайпылышлары булган 27 кеше стажировка проектында катнаша. «Игелекле Казан» ярдәмендә 112 бала эш тапкан һәм кибетләрдә, кафеларда, туклану департаментында, торак-коммуналь хуҗалык объектларында һәм башка тармакларда эшли.
«Теләсә нинди стажировка – ул, һичшиксез, бәһасез аралашу тәҗрибәсе. Әлеге чара эшкә урнашучы өчен дә, проектның башка катнашучылары, шул исәптән эш бирүче яки эшкә өйрәтүче тьютор өчен дә зур әһәмияткә ия. Танылу, һөнәр табу, коллективка һәм үз хыялыңдагы эшкә бару юлында күп адымнар ясарга туры киләчәк. Безнең төп бурыч – яшьләр үзләренең эш вакытын бушка уздырмыйча, нәтиҗәләр китерсә иде», - дип сүзен йомгаклады Татьяна Мерзлякова.
Алдарак «Игелекле Казан» автоном коммерцияле булмаган оешма штаб-фатирында балалар өчен инклюзив типография ачылуы турында хәбәр ителгән иде. Әлеге мәйданчык инвалид яшьләрне күздә тотып, һөнәри күнекмәләр үзләштерү һәм хезмәт эшчәнлегенә әзерлек максатыннан булдырылган. Типография битараф булмаган Казан иганәчеләре катнашында җыелган акчалар хисабына төзелгән.
Шулай ук укыгыз
-
24.11.2025, 17:55 -
24.11.2025, 17:41 -
24.11.2025, 17:20 -
24.11.2025, 17:03