Казанның бердәм диспетчерлык хезмәтенә су басу буенча 198 гариза кергән.

Быелдан башлап халык «Ачык Казан» системасында ишегалларын, подъездларны һәм йорт подвалларын су басу турында мөрәҗәгатьләр калдыра ала.

Фото: Денис Гордийко

(Казан шәһәре KZN.RU, 12-нче апрель, Камилә Гобәйдуллина). Казанда су басуларны бетерү буенча мөрәҗәгатьләр саны, узган ел белән чагыштырганда, ике тапкырга арткан. Бүгенге көндә Казанның Бердәм диспетчерлык хезмәтенә инде кешеләрдән 198 гариза кергән. Шәһәр Мэры Илсур Метшин бүген Башкарма комитетта узган эшлекле дүшәмбедә җаваплы хезмәтләргә ситуацияне контрольдә тотуны көчәйтергә кушты. Ул билгеләп үткәнчә, якын көннәрдә җитди җылыту көтелә, шуңа күрә район администрацияләренә, коткаручыларга һәм коммуналь хезмәтләргә тулы әзерлектә булырга кирәк.

«Барлык җаваплы хезмәтләрдән кулны пульста тотуыгызны, халыкның барлык мөрәҗәгатьләренә оператив җавап бирүегезне һәм вәзгыятьне һәр сәгать мониторинглап торуыгызны сорыйм», – диде Илсур Метшин.

Быелдан башлап халык «Ачык Казан» системасында ишегалларын, подъездларны һәм йорт подвалларын су басу турында мөрәҗәгатьләр калдыра ала. Узган атнада анда 72 гариза теркәлгән. Бер гаиләне вакытлыча урнаштыру пунктына күчерергә туры килгән. Мөрәҗәгатьләрнең күпчелек өлеше Совет, Идел буе һәм Авиатөзелеш районнарына туры килә, дип сөйләде Гражданнарны яклау идарәсе башлыгы Фердинант Тимерханов. Аның сүзләренә караганда, хәзерге вакытта Әки торак массивы янында Киндерка елгасында «Белянкино» коммерцияле булмаган бакчачылык ширкәте янында кар суларын чыгару эшләре дәвам итә. Идарәнең оператив төркеме Совет районы администрациясе белән берлектә елга юлын боздан чистарта, чүп-чарларны юк итә. Ләкин су якынлашуын дәвам итә.

2021 елдан башлап халык «Ачык Казан» системасында ишегалларын, подъездларны һәм йорт подвалларын су басу турында мөрәҗәгатьләр калдыра ала.

Ф.Тимерханов билгеләп үткәнчә, торак массивларда кар һәм яңгыр сулары агып төшү су үткәргеч каналлар һәм торбалар буйлап бара. Әмма еш кына участок милекчеләре үз уңайлыклары өчен җир каналларын каплый һәм грунт дәрәҗәсен күтәрә, шуның белән бергә кар суларына киртәләр барлыкка килә һәм түбән участокларны су басу куркынычы туа. Быел Салмачи торак массивында түбәнлектә төзелгән 17 йортны су баскан инде. Вахитов һәм Идел буе районнары Гражданнарны яклау идарәсе хезмәткәрләре тәүлек буе урында эшли. Казанда гомуми сыйдырышлылыгы 5 мең 208 кеше булган 15 вакытлы урнаштыру пункты әзерләнгән.

«Шәһәр хезмәтләренең җайга салынган хезмәттәшлеге нәтиҗәсендә җитди нәтиҗәләргә ирешелә. Әмма күрелә торган чаралар җитәрлек түгел. Су үткәрү каналларын, җир асты киңлекләрен чистарту һәм төзекләндерү, куакларны кисү һәм кече елгалар ярлары буйлап чүп-чар җыю эшләрен көчәйтергә кирәк. Бу чараларны үткәрү тиешле нәтиҗә бирми, чөнки кар аркасында бу эшләр капшап башкарыла. Йорт хуҗалыклары милекчеләрен аларның участоклары тирәсендә урнашкан су үткәрү каналларын, алар тарафыннан зыян күргән яки күмелгән урыннарны чистартырга җәлеп итәргә кирәк», – дип өндәде Ф.Тимерханов