Казанның ике районы йортларында 24 нче октябрьдә су яшел төскә керергә мөмкин

Бу җылылык үткәргечнең су агып чыгу урыннарын билгеләү буенча эшләр башкарылу белән бәйле.

Фото: Денис Гордийко

(Казан шәһәре KZN.RU, 20 нче октябрь). 24 нче октябрьдә Казанда җылылык үткәргечнең су агып чыгу урыннарын билгеләү буенча эшләр башкарылачак. «Азино» һәм «Горки» котельныйларыннан магистраль җылылык үткәргечләрнең челтәр суына яшел төстәге «Уранин-А» буягычы кертеләчәк.

Шәһәрнең Идел буе һәм Совет районнарында яшәүчеләр яшел су акканын күргән очракта, шул исәптән кайнар су белән тәэмин итү краннарыннан да, «Татэнерго» АҖ филиалының диспетчерлык хезмәтенә +7(843)291-87-95 (күп каналлы) телефоны буенча мөрәҗәгать итә алалар, дип хәбәр иттеләр шәһәр Башкарма комитетының Торак-коммуналь хуҗалык комитетында.

Уранин-А буягычын җылылык белән тәэмин итү системаларында куллану тыелмаган һәм Россия кулланучылар күзәтчелеге тарафыннан кешеләр сәламәтлеге һәм әйләнә-тирә мохит өчен зыянсыз булган индикатор сыйфатында рөхсәт ителә.

Шулай ук укыгыз

Барлык яңалыклар