Казанда Шәһәр көнен әзерләү һәм бәйрәм итү көннәрендә кайбер урамнар буенча хәрәкәтне чикләячәкләр

С.Хәким, Ш.Мәрҗани, Чернышевский урамнары вакытлыча ябылачак.

Фото: Марат Мөгыйнов

(Казан шәһәре KZN.RU, 22 нче август, Диана Жиленкова). Татарстан Республикасы һәм Казан шәһәре көнен бәйрәм иткән көннәрдә ТР башкаласының кайбер урамнарында хәрәкәтне чикләячәкләр, дип хәбәр итте эшлекле дүшәмбедә Казан Башкарма комитеты җитәкчесе урынбасары Гүзәл Сәгыйтова.

27 нче августта юллар Кремль урамы буенча һәм өлешчә Чернышевский урамы буенча ябылачак. Кирәк була калса, шулай ук М.Җәлил, К.Нәҗми һәм Лобачевский урамнары буенча хәрәкәтне ябарга мөмкиннәр. Шул ук көнне 13:00 сәгатьтән 15:00 сәгатькә кадәр С.Хәким урамы буенча, Әпсәләмов урамыннан Декабристлар урамына кадәр участокта, юл ябылачак.

29 нчы августның 22:00 сәгатеннән 31 нче августның 6:00 сәгатенә кадәр Мәрҗани урамы буенча, Татарстан урамыннан Ф.Кәрим урамына кадәрге участокта, хәрәкәт чикләнәчәк. Кирәк булганда Батурин урамы һәм аның янәшәсендәге Большая Красная һәм Федосеев урамнары участоклары буенча юлны ябачаклар.

Транспорт комитеты рәисе Әмир Сафин билгеләп үткәнчә, 28-31 нче августта Ш.Мәрҗани (Татарстан урамыннан алып Сафьян урамына кадәр), К.Насыйри (Татарстан урамыннан Ф.Кәрим урамына кадәр) һәм З.Солтан (Г.Тукай урамыннан К.Насыйри урамына кадәр) урамнары буенча юлларны ябачаклар.

29 нчы августтан 31 нче августка кадәр чикләүне С.Хәким урамында (Декабристлар урамыннан алып Әпсәләмов урамына кадәр участокта) һәм «Казан» гаилә үзәге янында кертәчәкләр. 30 нчы августта С.Хәким урамы 16:00 дән ябылачак, дип өстәде Г.Сәгыйтова.

Шәһәр халкына һәм кунакларына үз маршрутын алдан ук планлаштырырга һәм әйләнеп узу юлларын сайларга яки җәмәгать транспортыннан файдаланырга киңәш ителә.