Ватанны саклаучылар көнендә казанлылар кайтлар белән идарә итү буенча мастер-класска бара һәм гаилә эстафетасында катнаша ала

Чаралар «Манзара» паркының яр буе линиясендә һәм Җиңү паркында узачак.

Фото: Денис Гордийко

(Казан шәһәре KZN.RU, 21 нче февраль). 23 нче февральдә, Ватанны саклаучылар көнендә, казанлыларны һәм шәһәр кунакларын шәһәрнең җәмәгать киңлекләрендә төрле күңел ачу чаралары көтә.

11:00 сәгатьтә «Манзара» паркының яр буе линиясендә кайтлар белән идарә итү буенча мастер-класс узачак. Катнашучылар һава еланы белән идарә итәргә өйрәнә алачак, ул җил көче белән кар һәм боз буйлап хәрәкәт итәргә мөмкинлек бирә. Дәресләр башланыр алдыннан катнашучылар һәм тамашачылар өчен профессионаллар тамашасы узачак. Мастер-класста катнашу өчен урыннар саны чикләнгән. Сылтама буенча @kazanka.tatar инстаграм битендә теркәлү зарур. Барлык катнашучыларга да җылы аяк киеме кияргә киңәш итәләр. Оештыручылар билгеләп үткәнчә, чара һава шартлары аркасында күчерелергә дә мөмкин.

12:00 сәгатьтә Җиңү паркында «Әти һәм ул» гаилә эстафетасы узачак. Барлык теләүчеләрне ТР буенча РФ Гадәттән тыш хәлләр министрлыгы Баш идарәсенең янгын-коткару техникасы һәм җиһазлары күргәзмәсе көтә. Чара барышында гамәлдәге коткаручылар үз эшләре һәм төп куркынычсызлык кагыйдәләре турында сөйләячәк. Моннан тыш, һәр кеше спорт эстафетасында катнаша алачак, анда катнашучыларга янгын сүндерүчеләрнең костюмнарын кияргә, вакытка янгын сүндерү җиңсәсе белән йөгергә, шулай ук аркан тартышырга туры киләчәк, дип хәбәр иттеләр Казанның Парклар һәм скверлар дирекциясендә.

Шулай ук укыгыз

Барлык яңалыклар