Ураза гаете көнендә Казанда «Рамазан Фест» гаилә бәйрәме уздырыла

Бәйрәм программасы гаилә ныклыгы, яшьләр һәм өлкәннәр арасында буыннар чылбырын ныгыту темасына багышлана.

(Казан шәһәре KZN.RU, 28-нче май). Казанлыларны һәм башкала кунакларын 4-нче июнь көнне Ураза гаетен бәйрәм итәргә чакыралар – М.Горький исемендәге үзәк мәдәният һәм ял паркында 13.00 сәгатьтә «Рамазан Фест» дип исемләнгән гаилә бәйрәме узачак. Бәйрәм программасы гаилә ныклыгы, яшьләр һәм өлкәннәр арасында буыннар чылбырын ныгыту темасына багышлана.

Көн дәвамында чигү, бәйләү, күннән беләзекләр, пластилиннан, балчыктан төрле әйберләр ясау, акча сугу, рәсем ясау, баш яулыклары бәйләү буенча мастер-класслар узачак, никах күлмәкләре модасын күрсәтү планлаштырыла. Моннан тыш, дизайнер Нурия Умай мөселман модасында күзәтелгән трендлар турында лекция үткәрәчәк, дип хәбәр итә ТР мөселманнары Диния нәзарәте.

Шулай ук бәйрәмдә катнашучыларны төрле мавыктыргыч квестлар, аттракционнар, триал, воркаут тамашалары, футбол фристайлы белән куандырачаклар. Аниматорлар аквагрим, сабын куыгы очыру һәм фәнни тамашалар тәкъдим итәчәк. Төп сәхнәдә чараны Айрат Заһриев алып барачак. Бәйрәмдә шулай ук Ильяс Халиков башкаруында мөнәҗәтләр яңгыраячак.

Кунакларны сый-нигъмәтле табын, бүләкләр көтә. Программа күккә шарлар очыру белән төгәлләнәчәк. Чарада барлыгы 10 мең кеше катнашыр дип планлаштырыла.

Чараны ТР мөселманнары Диния нәзарәте Казанның Вахитов һәм Идел буе районнары мөхтәсибәтләре белән берлектә оештыра.

Исегезгә төшерәбез, Ураза гаете эшләми торган бәйрәм көн булып тора.