Туган тел көнендә Казанда 400 укучыдан торган җыелма хор чыгыш ясаячак

KZN.RU 26 апрельдә, бөек татар шагыйре Габдулла Тукайның туган көнендә шәһәрдә нинди чаралар узачагы турында сөйли

Бөек татар шагыйре Габдулла Тукайның туган көнендә, 26 апрель көнне, Казанда туган тел көне бәйрәм ителә. Казанның 400 баладан торган җыелма хоры ТР Дәүләт камера хоры белән берлектә «Туган тел» һәм «Мин яратам сине, Татарстан» җырларын башкарачак. Төрле милләт балалары җыр сүзләрен махсус өйрәнделәр.

Төп чаралар Галиәсгар Камал исемендәге театрның яңа бинасында булачак.

Биредә «Өч татар келәме» дигән уникаль проект, Туган тел көненә багышланган күргәзмә, «Печән базары» милли дизайн-маркеты, «Хәрәкәттә-бәрәкәт» проектыннан татар биюе буенча мастер-класс һәм «Апуш» студиясенең «Авыл эте Акбай» спектаклен күрсәтү булачак. 14:30 сәгатьтә театрның яңа бинасы янында Кабан күле буенда шигърият бәйрәме узачак, ә 16:00 сәгатьтә ел саен үткәрелә торган «Мин татарча сөйләшәм» акциясе башланачак, ул быел 20 нче тапкыр үткәрелә.

Шул ук көнне Ленин исемендәге мәдәният йортында «Тургай» татар җыр ансамбленең «Яшәү яме» проекты төркемнәре һәм композитор Морат Гайсин катнашында бәйрәм концерты була. Тормыш сөючеләр катнашындагы концерт шулай ук «Северный» торак массивының мәдәният йортында да узачак. Ә «Кадыш» мәдәният йортында Габдулла Тукай әкиятләре буенча куелган «Маски» театр студиясе спектакленең премьерасы булачак. Моннан тыш, «Яратам» яшүсмерләр клубында «Тукай-Фест: Татарстан йөрәге һәр сүздә» фестивале, ә «Вертолет» яшьләр үзәгендә «Сүз көче» шигырь һәм музыка микрофоны узачак.

«Адымнар» полилингваль комплексында «Социаль килешүнең һәм глобаль партнерлыкның нигезе буларак мәдәният һәм тел мирасының күптөрлелеге һәм диалогы» дигән фәнни-гамәли конференция узачак. Анда 1-11 сыйныф укучылары, укытучылар, тәрбиячеләр һәм педагоглар катнаша.

Туган тел көне алдыннан шәһәр китапханәләрендә һәм мәдәният йортларында чаралар планлаштырылган. Мәсәлән, 23 апрель көнне 26 нчы китапханәдә әдәби сәгатьләр узачак. 24 апрель көнне Үзәк балалар китапханәсе «Балалар. Китап. Вакыт», ә 37 нче китапханә «Тукайның әкияти иле» тематик бәйгенамәсенә чакыра.

23 апрель көнне Сәетгалиев исемендәге Мәдәният сараенда 7 яшьтән 20 яшькә кадәрге балалар һәм яшьләр өчен «Тукай йолдызлыгы»н укучылар конкурсы узачак. 24 апрельдә «Сәйдәш» мәдәни үзәге һәм «Фатир» иҗат студиясе «Туган тел көне – Тукай безнең йөрәкләрдә» дигән әдәби сәгать үткәрә.

25 апрель көнне «Вознесенск» мәдәният йортында «Туган телем — Тукай теле» Ачык республика фестиваленең гала-концерты була. Шул ук көнне «Чулпан» мәдәни үзәге Нәкый Исәнбәт әсәре буенча «Мырау батыр» балалар музыкаль спектаклен күрсәтәчәк.

Туган тел айлыгы кысаларында шәһәрнең мәгариф учреждениеләрендә 1 меңнән артык чара үткәрелгән инде. 7 меңнән артык укучы катнашкан «Йөрәкләрдә, уебызда, телебездә – Г.Тукай мәңгелек» шәһәр укучылар конкурсы төп конкурсларның берсе булды. Конкурсның финалы 4 апрельдә узды.

Шулай ук апрель башында «Сәйяр» балалар һәм яшүсмерләр театр коллективлары фестиваль-конкурсына йомгак ясалды. Анда 110 балалар бакчасыннан һәм 78 мәктәптән 2,3 меңнән артык бала катнашты. Финалга 18 мәктәпкәчә һәм 26 мәктәп төркеме чыкты, алар татар телендә иң яхшы спектакльләр күрсәттеләр.

Шулай ук укыгыз

Барлык яңалыклар