Яшьләр көнендә Казанда шигъри слэм, кино күрсәтү, байк-шоу һәм кибертурнир узачак

Татарстан башкаласында масштаблы фестиваль ачык һавада оештырылачак.

Фото: Денис Гордийко

(Казан шәһәре KZN.RU, 25-нче июнь). 27-нче июньдә, Яшьләр көнендә, Казанда масштаблы фестиваль узачак. Шәһәр мәйданчыкларында төрле иҗади, спорт һәм белем бирү чаралары: шигъри слэм, кино күрсәтү, байк-шоулар һәм башкалар оештырылачак.

17:00 сәгатьтән 20:00 сәгатькә кадәр Кабан күле яр буенда җәйге иҗат бәйгесе – шигъри слэм узачак. Анда бөтен Идел буеннан яшь шагыйрьләр һәм язучылар шигырьләр укыячак. Тамашачылар үзләре тавыш биреп, җиңүчеләрне билгеләячәк, аларның берсе арт-видео төшерү мөмкинлегенә ия булачак.

19:00 сәгатьтән 22:00 сәгатькә кадәр Казан паркларында яшьләрнең тулы метражлы һәм кыска метражлы фильмнарын күрсәтү, кино тенденцияләре турында лекцияләр һәм иҗади очрашулар планлаштырылган. 21:00 сәгатьтә Горький исемендәге Үзәк мәдәният һәм ял паркында режиссер Байбулат Батулин белән иҗади очрашу башлана. Шул ук вакытта Горки-Әмәт урманында заманча кино тенденцияләре турында кинолекция үткәреләчәк.

Шулай ук Яшьләр көне кысаларында 10:00 сәгатьтән 17:00 сәгатькә кадәр Good Game компьютер клубында кибертурнир узачак. Чемпионат ике этапка бүленгән: Казанда квалификация һәм финал.

Бәйрәмнең музыкаль өлеше «Ак Барс Арена»да 12:00 сәгатьтән 22:00 сәгатькә кадәр узачак. Төп сәхнәдә «Волга-Волга» фестивале кысаларында иҗат коллективлары чыгыш ясаячак. Тамашачылар «Братья Гримм», «Дом кукол», «Анимация», «Пауки» һәм башка башкаручылар чыгышларын күрә алачак.

Концерт белән беррәттән спорт һәм ретроавтомобильләр күргәзмәсе, байк-шоу һәм урта гасыр авылын реставрацияләү дә оештырылачак, дип хәбәр итә Татарстан Республикасы Яшьләр министрлыгы матбугат хезмәте.

Музыкантлар чыгышларының төгәл җәдвәле белән министрлык сайтында танышырга мөмкин.

Шулай ук укыгыз

Барлык яңалыклар