Шәһәр һәм Республика көнендә Казанда җәмәгать транспорты эшен 23:30 га кадәр озайтачаклар

Бәйрәм тәмамланганнан соң казанлылар өчен 32 автобус маршрутында ташу оештырыла

Шәһәр һәм Республика көнендә, 30 августта, Казанда җәмәгать транспорты эше озайтылачак: метрополитен һәм җир өсте транспорты 23:30 сәгатькә кадәр йөриячәк. Бу хакта эшлекле дүшәмбедә Казан Башкарма комитетының Транспорт комитеты рәисе Алексей Сидоров хәбәр итте.

Бәйрәм чаралары тәмамланганнан соң, халыкны уңайлы йөртеп җиткерүне тәэмин итү өчен 12:00 сәгатьтән 23:30 сәгатькә кадәр 1, 6, 10, 10а, 15, 18, 22, 28, 28а, 32, 29, 30, 31, 33, 35, 35а, 36, 43, 46, 47, 54, 55, 60, 62, 63, 70, 71, 72, 74, 75, 89, 90, 91, 5 номерлы автобуслар, 1, 3, 6, 7, 8, 5 троллейбус маршрутлары һәм 1, 3, 5, 5а, 7 номерлы трамвайларның эше көчәйтеләчәк.

Бәйрәм салютыннан соң тамашачыларны шәһәрнең барлык районнарына алып чыгу өчен махсус рейслар оештырылачак. 21 маршрутта 44 автобус пассажирларны көтәчәк:

ЦУМ һәм Спорт сарае арасындагы юл янында: Киров һәм Мәскәү районнарына бару.

Кремль яр буенда («Цирк» утравы): Вахитов, Идел буе һәм Совет районнарына озату.

Яшьләр үзәгендә: Вахитов, Идел буе һәм Совет районнарына китү.

«Казан» Гаилә үзәгендә: Авиатөзелеш, Яңа Савин, Киров, Мәскәү һәм Совет районнарына озату.

Үзәк стадион янында ( Кремль янында): Авиатөзелеш, Яңа Савин, Киров, Мәскәү районнарына юл тоталар.

Үзәк стадион янында (Ташаяк урамы ягыннан): Идел буе районына һәм Совет районнарына китү.

Шәһәр һәм Татарстан Республикасы көненә багышланган чараларны әзерләү һәм уздыру сәбәпле, Казанда кайбер урамнарда хәрәкәт вакытлыча чикләнәчәк.

Казанда Шәһәр һәм Татарстан Республикасы көненә багышланган чараларны үткәрүнең үзәк мәйданчыгы «Казан» Гаилә үзәгенә якын территория булачак. Шуңа күрә 24 августта 00:00 сәгатьтән 31 августта 7:00 сәгатькә кадәр Сибгат Хәким урамында Декабристлар урамыннан Әпсәләмов урамына кадәр хәрәкәт чикләнәчәк.

25 август 20:00 дән 31 август 11:00 гә кадәр Шиһабетдин Мәрҗани, Каюм Насыйри һәм Зәйни Солтан урамнары буйлап хәрәкәт чикләнәчәк.

22 августта 7:00 дән 31 августта 18:00 гә кадәр Чернышевский урамыннан 1 Май мәйданына кадәр участокта, Кремль урамы буенча хәрәкәт чикләнәчәк.

28 августта 8:00 дән 12:30 га кадәр Театр урамында, Карл Маркс урамыннан алып Дзержинский урамына кадәрге участокта хәрәкәт һәм парковка чикләнәчәк.

29 һәм 30 августта Федосеевская урамында, Батурин урамыннан Касаткин урамына кадәр хәрәкәт чикләнәчәк. Шулай ук 30 августта Казан ат спорты комплексы каршында машина кую урыны ябык булачак.

Транспорт комитеты хәрәкәтне чикләү буенча вакытлыча уңайсызлыкларга аңлап карауны сорый.