Декабрьдә казанлылар торак-коммуналь хуҗалык өлкәсендә грамоталылыкны күтәрү өчен бушлай тренинг уза ала

Йорт советлары әгъзаларына һәм торак милекчеләренә счет-фактураларны формалаштыру тәртибе, законнардагы үзгәрешләр һәм башка мәсьәләләр турында сөйләячәкләр.

Фото: Марат Мугинов

(Казан шәһәре KZN.RU 15-нче ноябрь). Казанда йорт советлары әгъзалары һәм торак милекчеләре өчен түләүсез укуга җыю бара. Тренингны «Татарстан Республикасының торак-коммуналь хуҗалыгы өлкәсендә иҗтимагый контроль төбәк үзәге» ассоциациясе оештыра.

Укыту бер көн дәвам итәчәк. Башта белгечләр лекцияләр форматында торак милекчеләренең хокуклары, гомуми җыелыш үткәрү тәртибе, күпфатирлы йортта гомуми милекнең статусы, совет һәм аның рәисе вәкаләтләре, торак һәм коммуналь хезмәтләр, күпфатирлы йорт белән идарә итү ысуллары, счет-фактураларны формалаштыру тәртибе, коммуналь ресурсларны куллануны исәпкә алу тәртибе, энергияне сак тоту принциплары, шулай ук законнардагы һәм юридик практикадагы соңгы үзгәрешләр турында сөйләячәкләр. Аннан соң ситуацияләрне тикшерәчәкләр, сораулар һәм җаваплар сессиясе оештырылачак. Катнашучыларга сертификатлар тапшырылачак.

Укуларны торак-коммуналь хуҗалык өлкәсендә экспертлар – ассоциациянең башкарма директоры Дмитрий Романов һәм юрист Зоя Куклина үткәрәчәк.

Тренингка +7(843)236-29-97 телефоны буенча язылырга мөмкин. Укулар декабрь башында узар дип планлаштырыла, дип хәбәр иттеләр «ТКХ Контроль» үзәгендә.