Декабрьдә Казан Бөтендөнья мирасны саклау конвенциясенең 50 еллыгына багышланган форумны кабул итәчәк

Чарада 1000 гә якын делегат катнашачак.

Фото: Денис Гордийко

(Казан шәһәре KZN.RU, 16 нчы ноябрь). 4 нче декабрьдән 9 нчы декабрьгә кадәр Казанда Бөтендөнья мәдәни һәм табигый мирасны саклау турындагы конвенциянең 50 еллыгына багышланган халыкара форум узачак, аны РФ Тышкы эшләр министрлыгы ТР Хөкүмәте белән берлектә оештыра. Чарада Россия һәм БДБ илләреннән, Азия, Африка һәм Латин Америкасыннан 1000 ләп делегат катнашачак.

«Спорт һәм социаль проектлар дирекциясе» автоном коммерцияле булмаган оешмасы хәбәр иткәнчә, 5 нче декабрьдә рәсми ачылу тантанасы һәм пленар утырыш булачак. 6-7 нче декабрьдә Казанның төрле мәйданчыкларында объектлар белән идарә итүчеләр, Бөтендөнья мирасы өлкәсендә яшь белгечләр, шулай ук сәнәгать һәм дини мирас тематикасы, «Бөек ефәк юлы» проекты һәм Пальмираны торгызу (САР) буенча конференцияләр узачак, катнашучылар ЮНЕСКО Бөтендөнья мирасы комитетының яшьләр моделе турында да фикер алышачак. 8 нче декабрьгә йомгаклау пленар утырышлары билгеләнгән.

1972 елгы Бөтендөнья мәдәни һәм табигый мирасны саклау конвенциясе – ЮНЕСКО канаты астында эшләнгән иң нәтиҗәле һәм киң танылган халыкара актларның берсе. Ярты гасыр дәвамында аның кысаларында Бөтендөнья мирасы исемлеге – гомумкешелек кыйммәтен һәм аерым яклау таләп итә торган күренекле мәдәни һәм табигый истәлекле урыннар исемлеге формалашкан.

Шулай ук укыгыз

Барлык яңалыклар