Казанның 26 балалар бакчасында ата-аналар соравы буенча дежур төркемнәр оештырылды

Бүген анда 368 бала йөри.

(Казан шәһәре KZN.RU, 6-нчы апрель, Ксения Швецова). Казанда 26 балалар бакчасында 41 дежур төркем эшли. Бүген анда 368 бала йөри. Калган әти-әниләр өчен балалар бакчаларында абонент түләве гамәлдән чыгарылачак, ә инде түләргә өлгерүчеләрнекен яңадан исәпләячәкләр. Бу хакта бүген коронавирус инфекциясе таралуга каршы тору буенча штаб утырышында Башкарма комитет җитәкчесенең беренче урынбасары Рөстәм Гафаров хәбәр итте.

Мәктәпкәчә белем бирү учреждениеләре аерым режимда эшли. Әйтик, дүшәмбе көнне, 30-нчы мартта, һәр балалар бакчасында дежур төркемнәр ачылган һәм 6 меңгә якын бала кабул итәргә планлаштырылган булса, нәтиҗәдә балалар бакчасына бары 1 мең бала килгән. Атна ахырына балалар саны 89-га кадәр кимегән.

«Әмма хәзер вәзгыять үзгәрә, һәм бүгенге көннән яңа төркемнәр ачылды, - диде Р.Гафаров. - Балалар бакчалары шәһәрнең барлык районнарында ачылды һәм ата-аналар соравыннан чыгып сайланды. Иң якындагы мәктәпкәчә белем бирү учреждениесен ата-аналар балалар бакчасы мөдиренә мөрәҗәгать итеп яки үз районнарының кайнар линиясенә шалтыратып таба алалар».

1-нче апрельдән балалар бакчаларын комплектлау башланды. Әмма санитар-эпидемиологик вәзгыять шартларында шәхси кабул итүләр әлегә башкарылмый. Шуңа күрә «Балалар бакчасына юлланды» гаризасы статусын алган ата-аналарга учреждение җитәкчесенә, санитар-эпидемиологик вәзгыять уңайланганнан соң, мөрәҗәгать итәргә кирәк булачак.

Әлеге мәсьәлә буенча оператив дистанцион эш өчен шулай ук кайнар линия телефоннары бар.

Мәктәпкәчә белем бирү учреждениеләренә балалар җыю мәсьәләләре буенча шәхси кабул итүләр, һәр ата-ананы алдан чакыру буенча билгеләнгән вакытта санитар-эпидемиологик вәзгыять яхшырганнан соң гына, үткәреләчәк, дип өстәде Р.Гафаров.

Башкарма комитет җитәкчесенең беренче урынбасары Татарстан Президенты Рөстәм Миңнеханов карары буенча балалар бакчаларында эшләми торган көннәр өчен абонент түләве бетереләчәген искәртте. Акча кертеп өлгерүчеләргә яңадан исәпләячәкләр.

Дежур төркем оештырылган якындагы балалар бакчасының адресын белү өчен, кайнар линия телефоннары буенча консультация сорап мөрәҗәгать итәргә мөмкин:

Мәгариф идарәсе: тел. +7(927)400-43-39, +7(927)400-40-71.

Район мәгариф бүлекләре: Авиатөзелеш һәм Яңа Савин районнары - тел. +7(927)400-49-17; Вахитов һәм Идел буе районнары - тел. +7(927)400-44-68; Киров һәм Мәскәү районнары - тел. +7(927)400-49-81; Совет районы - тел. +7(927)400-49-82.

Шалтыратулар дүшәмбедән җомгага кадәр 9.00-дән 18.00-гә кадәр (12.00-дән 13.00-гә кадәр тәнәфес) кабул ителә.