2023 елда пенсия тупланмаларын 2,5 мең татарстанлы алган

Түләүләрнең гомуми суммасы 122,8 миллион сумны тәшкил итә

Фото: Денис Гордийко

Узган ел вафат булган иминиятләштерелгән затларның пенсия тупланмаларын хокуклы варис хокукларында 2,5 мең татарстанлы алган. Түләүләрнең гомуми суммасы 122,8 млн сумны тәшкил иткән.

Түләүләр алу өчен иминиятләштерелгән кешенең вафатыннан соң ярты ел эчендә мөрәҗәгать итәргә кирәк. Гаризаны дәүләт хезмәтләре порталында, РФ Социаль фондының теләсә кайсы территориаль органында яки дәүләтнеке булмаган пенсия фондында бирергә мөмкин (бу пенсия тупланмалары акчаларының кайда формалашуына бәйле).

Гражданинның тупланган пенсия акчаларын бүлү турында социаль фондка үзе исән чагында тапшырган гаризасында күрсәтелгән затлар хокуклы варис булып санала. Мондый гариза булмаган очракта, түләүләрне туганнары, беренче чиратта – балалар, ир яки хатын, ата-аналар, ә икенче чиратта абый-энеләр, апа-сеңелләр, бабайлар, әбиләр һәм оныклар ала.

Әгәр гражданинның вафатыннан соң ярты елдан артык вакыт узган булса, түләүләрне алу өчен судка мөрәҗәгать итәргә мөмкин. Шул ук вакытта махсус хәрби операция зонасында һәлак булган иминиятләштерелгән затларның хокуклы варислары өчен түләүне сорап мөрәҗәгать итү вакыты чикләнмәгән, дип хәбәр итә РФ Социаль фондының ТР буенча бүлеге матбугат хезмәте.

Исегезгә төшерәбез, пенсия тупланмалары 1967 елда һәм соңрак туган гражданнар өчен формалаша. Моның өчен 2002 елдан 2013 елга кадәр рәсми керемгә ия булырга кирәк. Шул ук вакытта пенсия тупланмалары эш бирүчеләр тарафыннан иминият кертемнәре түләнгән ир-атлар (1953–1966 елларда туган) һәм хатын-кызлар (1957–1966 елларда туган) өчен; ана капиталы акчаларын пенсия формалаштыруга юллаган аналар өчен; 1967 елга кадәр туган, пенсия тупланмалары акчаларын уртак финанслау буенча дәүләт программасында ирекле рәвештә катнашкан гражданнарда формалаша.

Өстәмә мәгълүматны +7(800)100-00-01 телефон номеры буенча белергә мөмкин.

Шулай ук укыгыз

Барлык яңалыклар