2022 елда Казанда алданган өлешчеләрнең 302 гаиләсе үз йортларына күчкән

Хәзер шәһәрдә, өлешчеләр акчаларын җәлеп итеп, 110 объект төзелә.

Фото: Денис Гордийко

(Казан шәһәре KZN.RU, 14 нче февраль). 2022 елда Казанда алданган өлешчеләрнең 302 гаиләсе үз фатирларыннан ачкычлар алды. Габишев урамында «Мелодия» ТК һәм Аэропорт урамында «Жардин» ТК төзелеше тәмамланды. Шулай ук Г.Кутуй урамындагы йортның өлешчеләре дә үз хокукларында торгызылган – аларга компенсация түләгәннәр.

Кичә ТР Дәүләт Советы депутатлары һәм Казан шәһәр Думасы депутатлары, Казан Башкарма комитетының Торак сәясәте идарәсе каршындагы иҗтимагый совет утырышында өлешләп төзү мәсьәләләрен тикшерделәр. «Идарә 62 төзүченең эшчәнлеген контрольдә тота. Иҗтимагый совет хокук бозуларны профилактикалау, проблемалы объектлар барлыкка килү куркынычын киметү, контрольнең нәтиҗәлелеген арттыру, төзүчеләр белән хезмәттәшлекне яхшырту, закон инициативаларын эшләү, риск зонасында калган төзүчеләргә ярдәм итү максатында булдырылды», – дип аңлатты идарә башлыгы Ренат Шәмсетдинов.

Аның сүзләренә караганда, хәзер шәһәр территориясендә, өлешчеләр акчаларын җәлеп итеп, 110 объект төзелә. Торак сәясәте идарәсе мониторинг үткәрә, ә профиль бүлекләре хезмәткәрләре өлешләп төзү турындагы закон таләпләрен үтәү буенча төзүчеләргә консультация бирәләр.

Иҗтимагый совет рәисе, ТР Дәүләт Советының Торак сәясәте һәм инфраструктура үсеше комитеты әгъзасы Эмиль Хөснетдинов төзүчеләргә проектларны тормышка ашыру графигын үтәргә, йортларны төзү һәм файдалануга тапшыру вакытын бозмаска, хәбәрләрне вакытында дәүләт органнарына һәм өлешчеләренә җибәрергә тәкъдим итте.

Төзүчеләргә, йортларны өлешчеләр акчаларын җәлеп итеп төзүчеләргә кагылышлы актуаль мәсьәләләр турында киңәйтелгән түгәрәк өстәлләрдә экспертлар катнашында фикер алышу планлаштырыла.

Шулай ук укыгыз

Барлык яңалыклар