2021 елда 3 меңнән артык казанлы яңадан укулар узды һәм яңа һөнәр үзләштерде

Аларның 90%ы яңа эш тапкан яки элеккесен саклап калган, ләкин күбрәк акча эшли башлаган.

Фото: Денис Гордийко

(Казан шәһәре KZN.RU, 31 нче гыйнвар). Узган елда Казанның 3 меңнән артык кешесе шәһәрнең мәшгульлек хезмәте базасында яңадан белем алган һәм хезмәт базарында ихтыяҗ булган һөнәрләрне үзләштергән. Аларның 90%ы яңа эш урыннарына урнаша яки элеккеге эш урыннарында калып, югары хезмәт хакы ала башлаган.

«Демография» илкүләм проекты буенча шәһәрлеләргә 500дән артык юнәлеш тәкъдим ителде, дип хәбәр итте бүгенге эшлекле дүшәмбе вакытында Халыкны эш белән тәэмин итү үзәге директоры Тимур Муллин. Алар веб-дизайн, график дизайн, чәчтараш сәнгате, полиграфия технологияләре, эретеп ябыштыру технологияләре, ресторан сервисы, кондитер, пешекчелек эше, робототехника, цифрлы программалар белән идарә итү белән станокларда фрезер һәм токарь эшләре һәм башка юнәлешләр буенча белем алганнар. Укуларны Һөнәри осталыкны үстерү агентлыгы (Ворлдскиллс Россия), КФУ һәм Россия Халык хуҗалыгы һәм дәүләт хезмәте академиясенең Казан филиалы оештырган.

Укуларны узу өчен юлламаны Халыкны эш белән тәэмин итү хезмәте органнарында алырга мөмкин. Аннан соң «Россиядә эшләү» бердәм цифрлы платформасында гариза бирергә кирәк, анда белем бирү программасын, оешманы, укыту формасын сайларга мөмкин. Кулланучыга һөнәри ориентация үтәргә тәкъдим итәчәкләр, аның нәтиҗәләре буенча сайлап алынган укуларның максатка ярашлылыгы яки максатсызлыгы турында җиткереләчәк.

«Казанлыларны яңа өлкә үзләштерү һәм кирәкле белгеч алу уникаль мөмкинлегеннән файдаланырга чакырабыз», – диде Т.Муллин. Аны Башкарма комитет башлыгы Рөстәм Гафаров хуплады: «Эш бирүчеләр дә, хезмәткәрләр дә соңгы ике елда үз мобильлегең өстендә эшләргә кирәклекне аңладылар. Яңа күнекмәләрне тиз үзләштерергә әзер булган кешеләргә ихтыяҗ зур булачак», – диде Р.Гафаров.