КФУ галимнәре инсультны алдан белдерүче билгеләрне ачыклау ысулын тапканнар

Яңа фәнни мәгълүматлар пациентларга ярдәм итү өчен вакытында чаралар күрергә мөмкинлек бирәчәк

Фото: Марат Мөгыйнов

КФУның Фундаменталь медицина һәм биология институты галимнәре Франция, Германия һәм Испания коллегалары белән берлектә баш миендә патологик үзгәрешләр процессын – таралучы деполяризация дулкынын өйрәнгәннәр.

«Мондый дулкын төрле патологик халәтләрдә – ишемик инсульт, эпилепсия, мигрень һәм баш мие җәрәхәте вакытында барлыкка килә»», – дип җиткерде КФУның Фундаменталь медицина һәм биология институтындагы «Нейрофизиология» фәнни-тикшеренү лабораториясе баш фәнни хезмәткәре Рөстәм Хаҗипов.

Тикшерү барышында деполяризация дулкыннарының бер өлеше генә баш мие активлыгын басу белән бергә барганлыгы күрсәтелгән. Башка дулкыннар баш мие эшчәнлегенең зур үзгәрешләреннән башка яки хәтта аның көчәюе белән дә ачыкланган. Мондый үзгәрешләр күзәнәк дәрәҗәсендә ишемик инсульт вакытында була.

Яңа фәнни мәгълүматлар пациентларга ярдәм итү өчен вакытында чаралар күрергә мөмкинлек бирәчәк.

Шуңа бәйле рәвештә КФУда баш миенең электр активлыгының яңа параметрларын теркәргә мөмкинлек бирүче тәҗрибә аппараты булдырыла. Аны Мәскәү һәм Түбән Новгород фәнни учреждениеләре лабораторияләрендә хайваннарда сынап карау планлаштырыла.

Шулай ук укыгыз

Барлык яңалыклар