Идел буе районында менталь үсешләре бозылган балалар өчен укыту фатиры ачылачак

Ипподром урамындагы бинада хәзер ремонт эшләре бара

Фото: Марат Мөгыйнов

Тиздән Казанда Ипподром урамында үсеш үзенчәлекләре булган балалар өчен шәһәрдә өченче укыту-күнекмә фатиры ачылачак. Моннан тыш, шул ук урында менталь тайпылышлары һәм аутизм спектры бозылулары булган балалар өчен ял итү үзәге эшләячәк. Хәзер бинада ремонт бара, эшләрнең барышы турында шәһәр мэры Илсур Метшинга Вахитов һәм Идел буе районнары администрациясе башлыгы Альберт Салихов хәбәр итте.

223,79 кв.м мәйданлы объектта ремонт эшләре район предприятиеләре, учреждениеләре һәм идарәче компанияләре ярдәме белән алып барыла. Укыту-күнекмә фатирларында сәламәтлек үзенчәлекләре булган балалар гади күнекмәләрне үзләштерә: җыештыру, кер юу, тегү, пешерү. Тьюторлар ярдәмендә башкарыла торган мондый күнегүләр киләчәктә аларга көнкүрештә мөстәкыйльрәк булырга мөмкинлек бирәчәк.

Исегезгә төшерәбез, Татарстанда сәламәтлек үзенчәлекләре булган балалар өчен беренче укыту-күнекмә фатиры 2022 елның җәендә Казанның Зәкиев урамында ачылды. Анда Илсур Метшин булды, үзенчәлекле балаларның әти-әниләре белән аралашканнан соң, ул шәһәрнең һәр районында шундый объектлар ачарга кушты. Шул ук вакытта ул «Тормышка юл» проекты кураторы һәм авторы Светлана Сафиуллинага җиһазлар сатып алу өчен 100 мең сумлык сертификат тапшырды.

Узган елның көзендә Минск урамында сынау режимында шәһәрдә менталь тайпылышлары булган балалар өчен икенче укыту-күнекмә фатиры ачылды, бу айда ул тулы көченә эшли башлады. 2023 елның сентябреннән декабренә кадәр ике үзәктә барлыгы 53 бала белем алган.

Сәламәтлек мөмкинлекләре чикләнгән кешеләр өчен укыту-күнекмә фатирын Киров районының Юдино бистәсендә дә ачарга планлаштыралар.

Шулай ук укыгыз

Барлык яңалыклар