Казанда өченче «Фиджитал уеннар» февраль аенда старт ала

Программага Dota 2, MLBB, CS:GO һәм Warface турнирлары, шулай ук уеннарны тиз үтү һәм лазертаг буенча ярышлар керәчәк.

Фото: vk.com/gamesofuture

(Казан шәһәре KZN.RU, 20 нче гыйнвар). 5-11 нче февральдә Казанда өченче «Фиджитал уеннар» узачак. Катнашучылар уеннарны тизлек, тактик һәм сугышчан челлендж, лазертагта узуда көч сынашачак. Уеннарны IT-парк һәм «Казан-Экспо» халыкара күргәзмә үзәге мәйданчыкларында оештыралар.

Ярышларның фиджиталы сериясен уеннарның тиз узуы буенча турнир – speedrun ачып җибәрәчәк, ул 5-8 нче февральдә узачак. Җиңү өчен һәрберсендә 3 шәр спортчыдан торган 4 команда көч сынашачак. Аларга ретро-консолларда һәм заманча компьютерларда тизлек өчен видеоуеннар үтәргә туры киләчәк. Спортчылар Super Mario bros, Hitman: Codename 47, Chip’n’Dale, Quake, Comix Zone һәм башка уеннарда уйнаячак. Җиңүче команда, аның әгъзалары миссияне тизрәк узып, иң күп балл җыячак. Ярышлардан соң командалар лазертаг буенча шоу-матчта катнаша алачак. Җиңүчеләр өстәмә призлар алачак. Матч нәтиҗәләре турнирның киберспорт өлеше балларына тәэсир итмәячәк.

6-8 нче февральдә спортчылар көрәш челленджында көч сынашачак. 7 катнашучыдан торган 4 команда MOBA жанрларында уйнаячак: Dota 2 һәм Mobile Legends: Bang Bang. Матчлар, компьютер спорты кагыйдәләрен үтәп, олимпия системасы буенча узачак. Speedrunдагы кебек үк, кибер ярышлар тәмамланганнан соң, командалар лазертаг буенча шоу-матчта көч сынашачак.

9-10 нчы февральдә өч үлчәмле тактик көрәш дисциплиналары буенча турнир узачак. Анда 7 шәр кешедән торган 4 команда катнашачак. Алар үз осталыкларын CS:GO һәм Warface уеннарында күрсәтәчәкләр, шуннан соң лазертагта көрәшәчәкләр. Турнирның цифрлы өлешендә командалар башта бер-берсе белән консолда уйнаячак, җиңү өчен һәр раундта бер очко алачак. Аннары аларны «Фиджитал-ялкын кую» форматында лазертаг буенча 5 кә 5 матчы көтә. Бу дисциплинада катнашучылар турда җиңү өчен ике балл җыя алалар. Очколар тигезлеге булган очракта, ике этапта дошманны юк итү өчен күбрәк балл җыйган катнашучы җиңәчәк.

Өченче «Фиджитал уеннар» 11 нче февральдә CS:GO һәм Warface ярышларында катнашучылар арасында лазертаг буенча шоу-матч белән тәмамланачак. Көрәш форматы PUBG, Fornite компьютер уеннары кагыйдәләренә охшаш булачак.

Ярышлар «Киләчәк уеннары» проекты каналларында, «Вконтакте» социаль челтәре мәйданчыкларында һәм сылтама буенча трансляцияләнәчәк, дип хәбәр итә Спорт һәм социаль проектлар дирекциясе матбугат хезмәте.

Исегезгә төшерәбез, «Фиджитал уеннар» ТР башкаласында 2024 елда шәһәрдә узачак «Киләчәк уеннары» турниры алдыннан сынау чаралары буларак уздырыла. Барлыгы 5000 нән артык катнашучы булыр дип көтелә. Бөтен дөнья буенча онлайн-кибер ярышларны 150 миллионга кадәр кеше караячак.

Моңа кадәр Казанда уеннарның ике сериясе оештырылган иде, алар кысаларында Beat Saber ярышлары, дроннар, футбол, баскетбол, хоккей, көрәш, фиджитал форматында узышлар узды. Ярышларда барлыгы 7 илдән 38 команда катнашты. Уеннарны 36,5 млн кеше караган.

Шулай ук укыгыз

Барлык яңалыклар