Зур Казан боҗрасы буенча трамвай хәрәкәтен җәй ахырында ачу планлаштырыла

Объектта эшләр тәүлек буе алып барыла.

(Казан шәһәре KZN.RU, 28-нче апрель, Ксения Швецова). Зур Казан боҗрасын төзү эшләре тәүлек буе көчәйтелгән режимда алып барыла. Татарстан башкаласы тирәли боҗра буенча трамвай хәрәкәтен 30-нчы августка ачу планлаштырыла, дип хәбәр итте бүген ТР Министрлар Кабинетында узган брифингта ТР транспорт һәм юл хуҗалыгы министры Ленар Сафин.

«Имин һәм сыйфатлы автомобиль юллары» илкүләм проектын гамәлгә ашыру кысаларында алып барыла торган Зур Казан боҗрасын (БКК) төзү эшләре республика башкаласында юл хәрәкәтен оештыру өчен аерым әһәмияткә ия, дип билгеләп үтте Ленар Сафин. «Бүген эшләр ике этапта алып барыла: Мидхәт Булатов урамыннан Борисково урамына кадәр һәм Борисково урамыннан Техника урамына кадәрге участокта, - дип искәртте ул. - Бу республикада иң куәтле объектларның берсе. Без бик кырыс графикта эшлибез, катгый план буенча барабыз. Алга таба да графиктан тайпылышлар булмаса, 30-нчы августка Казан тирәли боҗра буенча трамвай хәрәкәтен ачарга планлаштырабыз».

«Бу объектны без бик озак көттек, ул шәһәргә бик кирәк, - дип хуплады министрны Казан Башкарма комитеты җитәкчесе урынбасары - Тышкы төзекләндерү комитеты рәисе Игорь Куляжев. - Зур Казан боҗрасы шәһәрнең Җиңү проспекты уза торган бер өлешен бушатып кына калмый, шәһәр үзәгендә - мәсәлән, Пушкин һәм Татарстан урамнарында юл хәрәкәтенең интенсивлыгына да йогынты ясаячак. Шулай ук Зур Казан боҗрасы хәрәкәт маршрутларын кыскартачак, бөкеләр азрак булачак, экология яхшырачак».

Исегезгә төшерәбез, Зур Казан боҗрасының беренче этабында https://www.kzn.ru/meriya/press-tsentr/novosti/v-stolitse-tatarstana-nachalos-stroitelstvo-novoy-dorogi-v-ramkakh-bolshogo-kazanskogo-koltsa/ 2019 елның июлендә Мидхәт Булатов урамыннан Борисково урамына кадәр төзелеш башланып китте, анда Ферма шоссесы өстеннән юл үткәргеч һәм җир асты кичүе белән 800 м озынлыктагы дүрт полосалы юл төзелә. Борисковская урамыннан Техника урамына кадәрге участокта төзелешнең икенче этабы мартта башланды. Участокның озынлыгы 1,22 чакрым тәшкил итә. Дүрт полосалы юл һәр юнәлештә ике полоса белән беренче класслы гомумшәһәр әһәмиятендәге магистраль урам категориясе буенча проектланган. 700 м озынлыктагы участокны 2020 елда, ә 522 м озынлыктагы участокны 2021 елда кулланылышка кертү планлаштырыла.

Элегрәк Зур Казан боҗрасы төзелешенең икенче этабы кысаларында Монастырь ермагы аша күпер салынуы билгеле булды.

Шулай ук укыгыз

Барлык яңалыклар