Театральләштерелгән перформанс һәм милли кием бәйрәме – Казанда шәһәр көнен ничек билгеләп үтәчәкләр?

Программада – шигъри баттл, альтернатив милли музыка һәм мода күрсәтү

Шәһәр көнендә, 30 августта, Кабан күле буенда алтынчы тапкыр «Милли кием» бәйрәме узачак. Чара программасында ачык дискуссияләр, шигъри баттл, мода күрсәтү һәм альтернатив татар музыкасы белән сәхнә. Бу хакта аппарат киңәшмәсендә Башкарма комитет җитәкчесе урынбасары Гүзәл Сәгыйтова хәбәр итте.

Бу көнне Мәрҗани урамы җәяүлеләр урамы булачак. Анда халык күңел ачулары узачак. Җирле артистлар альтернатив музыка белән чыгыш ясаячак, шулай ук «Милли тиңдәшлек хәзерге тормышка ничек интеграцияләнә?» дип аталган ачык бәхәс үткәрәчәкләр.

Моннан тыш, кунакларны Татарстанда яшәүче халыклар телләрендә шигъри баттл, шулай ук милли колоритлы әйберләр ярминкәсе көтә, анда уникаль сувенирлар һәм бүләкләр сатып алырга мөмкин булачак. Милли моданы бәяләүчеләр өчен милли костюм элементларын стилизацияләүгә багышланган лаборатория һәм мода күрсәтүе оештыралар. Бәйрәм 12:00 сәгатьтә башлана һәм 21:00 сәгатькә кадәр дәвам итәчәк, дип хәбәр итә Гүзәл Сәгыйтова.

Шулай ук шәһәр көне алдыннан Казан мэриясенең төп балконында «Казан тавышлары» театральләштерелгән перформансы җәелдереләчәк. Кунаклар һәм шәһәр халкы атмосферага 28 августта чума алачак.

Элегрәк хәбәр ителгәнчә, «Апуш» театр студиясе «Күзлек» театр лабораториясен оештыра, аның нәтиҗәсе драматург Туфан Миңнуллин юбилеена багышланган фестиваль булачак.