Кәрим Тинчурин исемендәге театр ачык һавада спектакльләр күрсәтәчәк

5-нче августта тамашачылар Туфан Миңнуллинның «Студентлар килешүе. Безнең көннәр» музыкаль комедиясен карый алачак.

(Казан шәһәре KZN.RU, 3-нче август). Казанда Кәрим Тинчурин исемендәге театр артистлары шәһәр халкына һәм кунакларына беренче тапкыр ачык һавада спектакльләр күрсәтәчәкләр. Моның өчен театр ишегалдында сәхнә җиһазландырылган, ә яңгырдан саклану өчен тамашачылар урыннары өстенә тент урнаштырылган.

Беренче спектакль 5-нче августта узачак - тамашачылар Туфан Миңнуллинның «Студентлар килешүе. Безнең көннәр» спектаклен күрәчәк. 6-нчы августта Хәй Вахит пьесасы буенча «Туй алдыннан» спектакле, 7-нче августта Исламия Мәхмүтованың «Син минем бердәнберем» мелодрамасы күрсәтеләчәк.

Театр хезмәткәрләре һәм тамашачылар куркынычсызлыгын тәэмин итү өчен оештыручылар тарафыннан барлык саклану чаралары да үтәләчәк. Тамашачылар урыннары шахмат тәртибендә урнашачак, аралары 1,5 метрдан да ким булмаячак. Спектакль алдыннан тамашачыларның температураларын үлчәячәкләр, битлек һәм перчаткалар бирәчәкләр, дип хәбәр итә ТР Мәдәният министрлыгы матбугат хезмәте.

Спектакль афишасы белән театр сайтында җентекләбрәк танышырга була.

Исегезгә төшерәбез, 3-нче августтан башлап Татарстанда ачык һавада ял итү чаралары уздыру рөхсәт ителә.

Шулай ук укыгыз

Барлык яңалыклар