Татарстанлылар үзизоляция вакытында өйдән чыгуга 1 миллионнан артык цифрлы пропуск алган

Барыннан да ешрак республика халкы бакчага барырга, туганнарына азык-төлек илтергә рөхсәт ала.

(Казан шәһәре KZN.RU, 7-нче апрель). Татарстанда үзизоляция режимы чорына кертелгән цифрлы пропусклар системасында бер атнадан да азрак вакыт эчендә республиканың 568 меңнән артык кешесе теркәлгән. Ә бирелгән цифрлы пропусклар саны 1 млн арткан.

Шулай итеп, бүген төш вакытына йорттан чыгуга 1 млн 160 мең 480 код-рөхсәт бирелгән. Система тарафыннан 4 млн смс-хәбәр кабул ителгән.

Татарстанлылар арасында өйдән чыгуга иң популяр сорау булып «6-нчы максат» - дачага чыгу яки дачадан кайту кала бирә. Моннан тыш, һәр дүртенче кеше диярлек кирәкле азык-төлек продуктларын һәм даруларны хезмәткә яраксыз туганнарына китерү өчен цифрлы пропуск рәсмиләштерә, дип хәбәр итә ТР Саннар министрлыгы.

Исегезгә төшерәбез, система Татарстанда 1-нче апрельдә эшли башлады. Цифрлы пропуск үзизоляция чорында республика халкына үз өйләрен калдырып китәргә мөмкинлек бирә. Хәзер республика халкы өйдән чыгу өчен 2590 кыска номерлы смс-хәбәрләр ярдәмендә генә түгел, махсус порталда шәхси кабинет аша да рөхсәт алырга мөмкин.

Махсус рөхсәттән башка үзизоляция урынын өзлексез цикл предприятиеләре, медицина оешмалары, даруханәләр, халыкны беренче кирәк-ярак продуктлары һәм товарлар белән тәэмин итүче оешмалар; кичектергесез ремонт һәм төяү-бушату эшләрен гамәлгә ашыручы оешмалар, шулай ук гадәттән тыш хәлләр шартларында кичектергесез эшләр башкаручы оешмалар хезмәткәрләре Татарстан Республикасы Министрлар Кабинеты тарафыннан расланган формадагы эш бирүче белешмәсе булганда гына калдырып китә алалар.

Цифрлы пропусклар алу мәсьәләләре буенча контакт-үзәк белгечләреннән кайнар линия номеры буенча консультация алырга мөмкин: +7(800)250-90-33.

Шулай ук укыгыз

Барлык яңалыклар