Татарстан күпфункцияле үзәкләре яшәү урыны буенча тавыш бирү турында гаризалар әзерли башлаячак

8-нче сентябрьдә Татарстанда республика Дәүләт Советына сайлаулар узачак.

(Казан шәһәре KZN.RU, 23-нче июль). 8-нче сентябрьдә Татарстанда республика Дәүләт Советына сайлаулар узачак. Прописка урыны буенча түгел, ә фактта яшәү урыны буенча тавыш бирү өчен татарстанлыларга тиешле гариза бирергә һәм ертып алына торган талон алырга кирәк. 24-нче июльдән 4-нче сентябрьгә кадәр бу эшне республиканың күпфункцияле үзәкләрендә башкарырга мөмкин булачак.

Хезмәт паспорт күрсәткәннән соң башкарыла. Паспорт алыштыру өчен тапшырылган икән, вакытлычабирелгән шәхес таныклыгын күрсәтергә кирәк. Россия территориясендә яшәү урыны буенча теркәлмәгән, әмма Татарстан территориясендә булу урыны буенча теркәлгән затларга теркәлү турында таныклык бирергә кирәк.

Барлык күпфункцияле үзәкләрдә дә хезмәт өстенлекле тәртиптә күрсәтеләчәк. Үзәк белгечләре гариза бирүчегә сайлаучының тавыш бирү көнендә кайда булуына, гариза төзүгә, шулай ук аерым талон бирүгә бәйле рәвештә иң уңайлы сайлау участогының номерын һәм адресын билгеләргә ярдәм итәчәкләр.

Яшәү урыны буенча сайлаучылар исемлегенә кертү турында гаризаны бары тик бер генә тапкыр гына тапшырырга мөмкин, дип хәбәр ителә «Минем документлар» дәүләт һәм муниципаль хезмәтләрнең рәсми интернет-порталында.

Шулай ук укыгыз

Барлык яңалыклар