Татарстан туристлык-рекреацион кластерлар булдыруга багышланган бөтенроссия конкурсының финалисты булды

Иң күп тавышларны «Биектау» һәм «Кама Тамагы» комплекслары проектлары җыйды.

(Казан шәһәре KZN.RU, 29-нчы июль). Татарстан Россиядә туристлык-рекреацион кластерлар булдыруга һәм экотуризмны үстерүгә багышланган бөтенроссия конкурсы финалистларының берсе булды. Республикадан финалга 2 проект - «Биектау» һәм «Кама Тамагы» туристлык-рекреация комплекслары узды. Җиңгән очракта Татарстан Биектау районында Зәңгәр күлләр территорияләрен, Кама Тамагы районында Лобач тавы һәм Юрий мәгарәсе янында территорияләрне төзекләндерү өчен федераль финанслау алачак.

Конкурс финалистлары буларак 34 команда танылды: 33 проект эксперт төркеме бәяләве һәм конкурс комиссиясе әгъзаларының тавыш бирү нәтиҗәләре буенча, Волгоград өлкәсеннән бер проект - халык тавыш бирү нәтиҗәләре буенча финалга үтте.

Финалга чыккан проектлар саны буенча Ерак Көнчыгыш федераль округы лидер булды, ул 7 проект тәкъдим итте. Финалга чыгучылар саны буенча икенче урынны Идел буе федераль округы алды - 6 проект. Өченче урынны Төньяк-Көнбатыш, Үзәк һәм Себер федераль округлары үзара бүлеште - һәрберсендә 5-әр проект. Көньяк федераль округтан финалга 4 проект, Урал федераль округыннан - 2 проект чыкты.

Финалистлар конкурсның киләсе этабында җиңү өчен көрәшне дәвам итәчәк. Җиңүчеләргә территорияләрне төзекләндерүгә федераль акчалар бүлеп биреләчәк. Финал һәм җиңүчеләрне игълан итү 15-нче ноябрьгә планлаштырылган, дип хәбәр ителә конкурс сайтында.

Исегезгә төшерәбез, конкурска Россия Федерациясенең 68 субъектыннан барлыгы 115 гариза бирелгән иде. Татарстаннан конкурста 5 проект тәкъдим ителде, шуларның икесе финалга чыкты. Халык тавыш бирүе игълан ителде, Татарстан төбәкләр арасында беренче урынны алды, ә проектлар рейтинг лидерлары рәтенә керде.

Шулай ук укыгыз

Барлык яңалыклар