Татар затлы ризыклары һәм автор эшләнмәләре: Казанда «Бияләй» Яңа ел ярминкәсе узачак

Эшмәкәрләр 18 декабрьгә кадәр ярминкәдә катнашу өчен гариза бирә алалар

Казанда 24 декабрьдән 8 гыйнварга кадәр «Әкият» курчак театры янында «Бияләй» Яңа ел ярминкәсе узачак. Шәһәрлеләр төрле ризыклардан авыз итә, шулай ук һөнәрчеләрнең авторлык эшләнмәләрен сатып ала алачак. Ярминкәдә катнашучылар өчен гаризалар 18 декабрьгә кадәр кабул ителәчәк. Бу хакта эшлекле дүшәмбедә Туризмны үстерү комитеты директоры Александр Шавлиашвили хәбәр итте.

«Әкият» театры янындагы мәйданчык күп еллар буш тора. Казан халкы әлеге урынны иҗтимагый киңлек буларак кабул итә. Без анда кышын боз шәһәрчеген ачтык, җәен чәчәкләр фестивале үткәрдек. Метро станциясе белән күршелек бик уңайлы. Ышанам ки, килүчеләр саны күп булачак», – дип билгеләде шәһәр мэры Илсур Метшин. Ул Туризмны үстерү комитеты командасына массакүләм мәгълүмат чаралары аша халыкка ярминкәнең эш чоры һәм режимы турында мәгълүмат бирергә, шулай ук чарага килүчеләрнең куркынычсызлыгы, чүп-чарны чыгару һәм башка мөһим таләпләр турында сөйләргә кушты.

Александр Шавлиашвили сөйләвенчә, ярминкәнең исеме – «Бияләй».

«Бу сүз генә түгел, ә җанны җылытырга сәләтле тирән образ. Ул, җылы бияләйләр шикелле, безне туган учагыбызның рәхәтлеге, кайгысыз балачак һәм өйдәге аш бүлмәсенең тәмле исе турындагы истәлекләр белән чолгап ала, татар кунакчыллыгының һәм үзенчәлекле милли төснең бөтен җылысын чагылдыра», – дип өстәде докладчы.

Ярминкә эш көннәрендә 16:00 дан 22:00 гә кадәр, шулай ук ял көннәрендә 12:00 дән 22:00 гә кадәр эшләячәк. Кунакларны һәм шәһәр халкын гастрономия кибетләре көтә: аларга кабартма, өчпочмак, кыстыбый, пылау, токмач, бал һәм төрле татар затлы ризыкларыннан авыз итәргә тәкъдим итәчәкләр. Шулай ук ярминкәгә килүчеләр һөнәрчеләрдән аермалы бүләкләр, шул исәптән итекләр һәм бияләйләр алачак.

Моннан тыш, чара кунаклары өчен күңел ачу программасы әзерләнгән, аны Парклар һәм скверлар дирекциясе, Вахитов һәм Идел буе районнары администрациясе оештыра.

Ярминкәдә катнашучылар өчен гаризалар 18 декабрьгә кадәр кабул ителәчәк. Сайлап алу түбәндәге күрсәткечләр буенча башкарылачак: эшләнгән тематик меню, җирле продуктлар һәм материаллар куллану, тәкъдим ителгән товарларның алыштыргысызлыгы һәм Яңа ел тематикасы.

Александр Шавлиашвили шулай ук кунакларны Казанга җәлеп итү буенча параллель эш алып барылуына игътибар итте. Мәсәлән, Парклар һәм скверлар дирекциясе һәм Nordwind авиакомпаниясе белән партнерлыкта Туризмны үстерү комитеты махсус программа эшләтеп җибәрде. Анда пассажирларга махсус меню җыелмасы, истәлекле бүләкләр һәм ташламалар тәкъдим итүче 25тән артык кунакчыллык объекты кергән.

«Акция шәһәребезгә ышанычны арттыра: авиакомпаниянең 750 меңнән артык клиенты Казанга Яңа ел бәйрәмнәренә чакыру алачак. Ул 31 гыйнварга кадәр дәвам итәчәк», – дип йомгаклады докладчы.

Тәкъдимнәр исемлеге белән go.kzn.ru Туристлык порталында танышырга мөмкин.

Фоторепортаж

Видеорепортаж

15.12.2025 13:50

Шулай ук укыгыз

Барлык яңалыклар