2024 ел башыннан 225 меңнән артык татарстанлы Социаль фонд хезмәтләреннән электрон форматта файдаланган

Һәркем үз хезмәт кенәгәсе мәгълүматларын һәм исемле шәхси счетын читтән торып тикшерә ала

Фото: Денис Гордийко

Ел башыннан Татарстанда яшәүче 225 мең 420 кеше Россия Социаль фонды хезмәтләреннән электрон рәвештә файдаланган. Дәүләт хезмәтләре порталында фонд эшчәнлегенең барлык юнәлешләрен дә диярлек колачлаган йөздән артык сервис эшли. Аларга, әйтик, пенсия, социаль түләүләр һәм балаларга пособиеләр, инвалидлыгы булган кешеләрне һәм өлкән яшьтәге гражданнарны карап тәрбияләгән өчен түләүләр билгеләү, эшкә вакытлыча яраксызлык кәгазьләре бирү, хәрбиләр гаиләләренә ярдәм итү чаралары күрсәтү һ.б. керә.

Шулай да татарстанлылар арасында Социаль фонд тарафыннан электрон рәвештә күрсәтелә торган иң актуаль хезмәтләр түбәндәгеләр: пенсия билгеләү һәм түләү, бердәм пособие билгеләү, ана капиталы чаралары белән идарә итү.

Моннан тыш, дәүләт хезмәтләре порталында булачак пенсионерларга үзләренең электрон хезмәт кенәгәләре мәгълүматларын һәм исемле шәхси счетларын тикшерергә, пенсия тупланмаларыннан бер тапкыр түләү алуга гариза тапшырырга мөмкинлек бирүче сервислар тәкъдим ителгән.

Шулай ук инвалидлыгы булган гражданнар һәм аларның вәкилләре тернәкләндерүнең техник чараларын алуга гариза бирә һәм, махсус урыннарга кую хокукын рәсмиләштерү өчен, автомобильләрен терки ала.

«Фонд хезмәтләреннән файдалану форматын һәркем үзе сайлый: гражданин электрон вариантка өстенлек бирергә яки фондның клиентлар хезмәтенә яисә күпфункцияле үзәккә мөрәҗәгать итәргә мөмкин. Республикада клиентлар хезмәтенең 50 дән артык офисы эшли. Моннан тыш, контакт-үзәк операторлары көн саен 100 дән артык шалтырату кабул итә. Алар күп кенә мәсьәләләрне читтән торып хәл итүгә ирешәләр», – дип билгеләп үтте Россия Социаль фондының Татарстан бүлекчәсе идарәчесе Эдуард Вафин.

Өстәмә мәгълүматны Россия социаль фондының Бердәм контакт-үзәге телефоны буенча алырга мөмкин: +7(800)100-000-1 (шалтырату бушлай).

Шулай ук укыгыз

Барлык яңалыклар