Татарстанда ел башыннан 2 меңнән артык гаилә ана капиталы хисабына торак шартларын яхшырткан

Тапшырылган гаризалар нигезендә Россия социаль фонды 1,3 млрд сум акча күчергән

Фото: Денис Гордийко

Ел башыннан Татарстанда 2226 гаилә ана капиталы акчаларын торак шартларын яхшыртуга тоткан. Аларның 231 е сертификатны, кредит акчаларын җәлеп итмичә, торакны турыдан-туры сатып алу өчен файдаланган, калганнары банклардан алынган кредитларын түләгән. Гаиләләр тарафыннан тапшырылган гаризалар нигезендә Россия социаль фонды 2024 елда 1,334 млрд сум акча күчергән.

Торак шартларын яхшырту республикада ана капиталы белән идарә итүнең иң популяр юнәлеше булып кала. Программа гамәлгә ашырыла башлаган вакыттан алып бүгенге көнгә кадәр 300 меңнән артык татарстанлы әлеге мөмкинлектән файдаланган.

Тема буенча материаллар:

Владимир Путин ана капиталы программасын 2030 елга кадәр озайтырга тәкъдим итте

«Гаиләләр кооперативка керә яки кредит рәсмиләштерә ала. Шулай ук, кредит акчаларын кулланмыйча, ана капиталына йорт төзү вариантын да карап тикшерергә була. Быелдан әти-әниләрнең акчаны блоклап төзелгән йортларны реконструкцияләүгә юнәлтү мөмкинлеге барлыкка килде», – дип билгеләп үтте Россия социаль фондының Татарстан бүлекчәсе идарәчесе Эдуард Вафин.

Торак шартларын яхшыртуга акчаны балага өч яшь тулгач кына юнәлтергә мөмкин. Кагыйдәдән чыгарма – ана капиталын төп бурычны яки ипотека буенча беренчел кертемне түләү өчен файдалану. Бу очракта акчаны бала туганнан соң яки уллыкка бала алганнан соң ук торак сатып алуга тотарга була.

Сертификаттан файдалануга гаризаны дәүләт хезмәтләре аша яки банкта кредит рәсмиләштергән вакытта юлларга мөмкин. Моның өчен Россия Социаль фонды республиканың кредит оешмалары белән мәгълүмати хезмәттәшлек турында килешү төзеде.

Ведомствода хәбәр итүләренчә, өстәмә мәгълүматны Россия Социаль фондының бердәм контакт-үзәге телефоны буенча ачыкларга мөмкин: +7(800)100-00-01 (шалтырату бушлай).

Шулай ук укыгыз

Барлык яңалыклар