Сәүдә биржасында акча эшләргә карар итеп, ТР башкаласында яшәүче хатын-кыз 2 млн сумнан артык югалткан

Хатын-кыз мошенникларга сентябрьдән октябрьгә кадәр акча күчергән

Сәүдә биржасында акча эшләргә теләп, Казанда яшәүче 32 яшьлек хатын-кыз мошенникларның хәйләләренә эләккән. Ул берничә кредит алган һәм машинасын саткан. Зыянның гомуми суммасы 2 млн 100 мең сум тәшкил иткән. Акчаны хатын сентябрьдән октябрьгә кадәр күчергән.

Август ахырында социаль челтәрләрнең берсендә зыян күрүче Роман исемле яшь кеше белән танышкан, ул аны сәүдә биржасында акча эшләргә күндергән. Соңрак аның белән билгесез кыз элемтәгә кергән һәм телефонга нинди кушымталар куярга һәм ничек керем алырга кирәклеген аңлаткан. 56 мең сум күләмендә шәхси акчаларын аферачылар җитәрлек түгел дип санаганнар, шуңа күрә алар хатын-кызны 800 мең сумга кредит алырга күндергәннәр. Бу акчаларны зыян күрүче чит ил акча берәмлегендә керткән.

Берникадәр вакыттан соң хатын-кызга Максим шалтыраткан, ул аның исәбендә 2 млн сумнан артык акча булуын хәбәр иткән. Әмма бу сумманы чыгару өчен 300 мең сум кертергә кирәк булган. Икенче кредитны рәсмиләштергәннән соң зыян күрүчегә тагын акча кирәк булачак, дип сөйләгәннәр. Алдау юлы белән мошенниклар аны 300 һәм 200 мең сум кредит алырга күндергәннәр. Соңрак аферачылар тагын ярты миллион сум таләп итә башлаганнар. Моның өчен хатын-кыз автомобиль саткан, ә кергән акчаларны чит хисапларга күчергән. Бу да җитәрлек түгел булып чыкты, һәм җинаятьчеләр тагын 200 мең сум сораганнар. Бу юлы зыян күрүче мошенникларның корбаны булуын аңлаган.

Кыз ярдәм сорап «Горки» полиция бүлегенә мөрәҗәгать иткән, анда РФ Җинаять кодексының 159 маддәсе 4 өлеше буенча «Мошенниклык» буенча җинаять эше кузгатканнар. Хәзер полиция хезмәткәрләре барлык хәлләрне ачыклый һәм шикләнелүчеләрне эзли, дип хәбәр итә Россия Эчке эшләр министрлыгының Казан буенча идарәсе матбугат хезмәте.

Идарә тармагында шуны искәрттеләр: мошенниклар корбаны булмас өчен, билгесез затлардан килгән барлык мәгълүматны яңадан тикшереп чыгарга кирәк. Таныш булмаган кешеләргә банк карталарыгыз һәм хисап язмаларыгыз турында мәгълүмат бирергә, билгесез реквизитларга акча күчерергә кирәкми.

Исегезгә төшерәбез, Татарстанда Россия Социаль фонды бүлекчәсенең ялган хезмәткәрләре тарафыннан шалтырату очраклары теркәлгән. Җинаятьчеләр пенсионерларга кәрәзле телефоннарга шалтыратканнар һәм идарә тармагына яки КФҮкә кабул итүгә язылу сылтавы белән СМС-хәбәрләрдән раслау кодын атауларын сораганнар.

Шулай ук укыгыз

Барлык яңалыклар