Привольный һәм Вишневка бистәләрендә яшәүчеләр Совет районы администрациясе белән мәктәп төзелеше турында фикер алышты

Очрашуда активистларга Фиалковая урамында уку йорты урнаштыру мөмкинлеге каралуы турында сөйләделәр.

Фото: Марат Мугинов

(Казан шәһәре KZN.RU, 19-нчы март, Алинә Бережная). Мәктәп һәм балалар бакчасы төзелеше, шулай ук юлларны төзекләндерү турында бүген Казанның Совет районы администрациясе җитәкчелеге белән Привольный һәм Вишневка авылларында яшәүчеләр фикер алышты. Хәзер бистәләрдә мәктәпкәчә һәм мәктәп яшендәге 2,2 меңнән артык бала яши. Совет районы хакимияте башлыгының беренче урынбасары Андрей Яковлев очрашуда катнашучыларга мәктәпнең кайда барлыкка килуе һем автобус маршрутларын озынайту планнары турында сойледе.

Бистә активистлары әлеге проблемалы темаларны агымдагы елның февраль аенда район хакимиятенең халык белән хисап очрашуларында җиткерде. Барлык мәсьәләләр дә эшләнүгә алынды, дип хәбәр итте А.Яковлев. Аерым алганда, узган атнада администрация хезмәткәрләре бистәләргә барып, өйләрне карап чыкты. Бистәләрдә мәктәпкәчә яшьтәге 1095 бала һәм 1186 укучы яши икән.

Хәзерге вакытта Фиалковая урамында мәктәп төзү мөмкинлеге карала, дип сөйләде Совет районы хакимияте башлыгының беренче урынбасары. «Бер бала өчен нормативлар буенча 23 кв. метр тиеш, типлаштырылган мәктәп 2,5 гектар мәйданны били. Бездә кирәкле территория бар», – диде очрашуда Андрей Яковлев.

Бистәдә яшәүчеләр мәктәп төзергә планлаштырылган территория белән янәшә күл булуына игътибар иткән. Активистлар сулыкны һәм аның яр буен төзекләндерергә тәкъдим ясады.

Мәктәп төзелеше мәсьәләсен хәл итүгә вакыт кирәк булганга, ТР Дәүләт Советы сәркәтибе Лилия Маврина вакытлы альтернатива сыйфатында мәктәп автобусы оештырырга тәкъдим итте. Привольный һәм Вишневкада яшәүчеләр бу тәкъдимне хуплады. Алар сүзләренә караганда, мәктәп автобусы кирәк, чөнки хәзер бистәләрдән шәһәргә бары тик үз машиналарында яки шәхси маршрут таксида гына барып була, ләкин аның җәдвәле даими үзгәрә, һәм рейслар даими рәвештә ясалмый. «Без машиналарга берничә бала утыртабыз һәм һәр иртә аларны бистәләрдән якын-тирәдә урнашкан мәктәпләргә илтәбез», – дип сөйләде активист Артем Юдинцев. Очрашуда мәктәп автобусына кагылышлы сорауны алга таба эшләүгә алдылар, чөнки ул юлны төзекләндерү буенча өстәмә карарлар таләп итә.

Андрей Яковлев гамәлдәге автобус маршрутын озайту планнары турында сөйләде, әмма моның өчен шулай ук юлны төзекләндерү мәсьәләсен хәл итәргә кирәк. «Даими автобус маршрутлары хәрәкәтен оештыру күздә тотылган юл каты асфальт-бетон өслегенә ия булырга тиеш. Автобуслар борылышы өчен мәйданчык кирәк. Моннан тыш, җәяүлеләр хәрәкәте өчен тротуарлар, керү карманнары һәм көтү павильоннары белән җиһазландырылган тукталыш пунктлары, җәяүлеләр кичүләре, яктырту, юл билгеләре кую, тамга кую зарур», – дип аңлатты Совет районы администрациясе башлыгының беренче урынбасары һәм әлеге мәсьәләнең шулай ук контрольдә булуын өстәде.

«Без сезнең белән очрашырга әзер, сез, активистлар буларак, барлык мәгълүматны үзгәртелмәгән формада халыкка җиткерегез. Безнең мәнфәгатьләрдә исә бистәләрдәге тормышны уңайлырак итү», – дип йомгаклады Андрей Яковлев. Халык белән очрашулар даими үткәреләчәк, дип планлаштырыла.