Татарстан башкаласы биатлон буенча Россия Кубогының өченче этабын кабул итәчәк

Ярышларга илнең 21 төбәгеннән 80 нән артык катнашучы гариза биргән

Казанда 31 гыйнвардан 2 февральгә кадәр ветераннар арасында биатлон буенча Россия Кубогының өченче этабы узачак. Спортчылар «Мастерс» категориясендә кечкенә калибрлы коралдан атачак.

Россия Кубогы кысаларында ирләр һәм хатын-кызлар арасында узышлар һәм спринтлар оештырачаклар. Җиңү өчен илнең 21 төбәгеннән 80 нән артык спортчы (35 яшьтән 70 яшькәчә һәм аннан өлкәнрәк) көч сынашачак.

Ярышлар «Мирный» чаңгы-биатлон комплексында узачак.

Ярышларның төгәл җәдвәле:

1 февраль, 10:30 сәгатьтә – 10 чакрымга йөгерү (60–64 яшьлек ирләр, шулай ук 35 яшьтән 49 яшькәчә хатын-кызлар) һәм 8 чакрым (65–69 яшьлек һәм аннан өлкәнрәк ирләр, 50 яшьтән өлкәнрәк хатын-кызлар).

1 февраль, 13:00 сәгатьтә –12,5 чакрымга йөгерү (35 яшьтән 49 яшькәчә ирләр) һәм 10 чакрым (50 яшьтән 59 яшькәчә ирләр).

2 февраль, 10:00 сәгатьтә – 7,5 чакрымга спринтлар (35 яшьтән 49 яшькәчә ирләр) һәм 6 чакрым (50 яшьтән 59 яшькәчә ирләр).

2 февраль, 12:30 сәгатьтә – 6 чакрымга спринтлар (60 яшьтән 64 яшькәчә ирләр, шулай ук 35 яшьтән 49 яшькәчә хатын-кызлар) һәм 4,5 чакрым (65–69 яшьлек һәм аннан өлкәнрәк ирләр, 50 яшьтән өлкәнрәк хатын-кызлар).

Россия Кубогында РФнең Биатлонистлар союзы президенты Виктор Майгуров булачак, дип хәбәр иттеләр физик культура һәм спорт комитетында.

Шулай ук укыгыз

Барлык яңалыклар