«Казан коррупциягә каршы!» иҗади эшләр бәйгесенә гаризалар кабул ителә башлады

«Казан коррупциягә каршы!» иҗади эшләр бәйгесенә гаризалар кабул ителә башлады

<p> «Казан коррупциягә каршы!» дип аталган иҗади эшләр бәйгесенә гаризалар кабул ителә башлады. Бәйгедә мәктәп укучылары, студентлар һәм яшьләр катнаша ала. Яшь чикләве – 14 яшьтән алып 35 яшькә кадәрге яшьләр. Бу хактагы карарны «Муниципаль хокукый актлар һәм башка рәсми мәгълүмат» челтәр басмасында табарга мөмкин. </p> <p> Җиңүчеләрне өч номинация буенча билгеләячәкләр. Әйтик, коррупциягә каршы иң яхшы проект өчен беренче урынга 7 мең сум, икенче урынга 6 мең сум, өченче урынга 5 мең сум акчалата бүләк тапшырылачак. Махсус бүләк сыйфатында өч лауреатка 2 шәр мең сум акча биреләчәк. </p> <p> Коррупциягә каршы эшләнгән иң яхшы цифрлы плакат өчен җиңүчегә 6 мең сум каралган. Икенче урынга 5 мең сум, өченче урынга 4 мең сум акчалата бүләк биреләчәк. Алты лауреат 2 мең сум күләмендә акчалата бүләк алачак. </p> <p> «Коррупциягә каршы юнәлештәге иң яхшы видео» номинациясендә беренче урын өчен – 15 мең сум, икенче урын өчен – 12 мең сум, ә өченче урын өчен 10 мең сум бүләк тапшырылачак. Дүрт лауреатка 3 әр мең сум биреләчәк. </p> <p> Гаризалар 16 ноябрьгә кадәр кабул ителә. Материалларны <a href="mailto:anticorr.kzn@gmail.com">anticorr.kzn@gmail.com</a> (файлны йөкләтү өчен сылтаманы күрсәтергә кирәк) электрон почтасына юлларга кирәк. Бәйге эшләрен теләге булган кешеләр үзләре Кремль урамы, 1 йорт адресы буенча 622 кабинетка илтеп тапшыра ала. </p> <p> Икенче этап кысаларында 22 ноябрьдән 29 ноябрьгә кадәр ачык онлайн-тавыш бирү уздырыла. Йомгаклау этабы 9 декабрьгә кадәр тәмамлана, ди оештыручылар. Эшләр креативлык һәм фикер яңалыгы, эчтәлекне ачу тирәнлеге, башкару сыйфаты һәм башка критерийлар буенча бәяләнәчәк. </p> <p>   </p>

2025-09-25T15:11:52+0300