«Казан Яңа елга әзер» конкурсында катнашуга гаризалар кабул итү башланды

Җиңү өчен туристлык индустриясе предприятиеләре көч сынаша алачак.

Фото: Денис Гордийко

(Казан шәһәре KZN.RU, 15-нче декабрь, Алена Мирошниченко). Бүген «Казан Яңа елга әзер» туристлык индустриясе объектларының иң яхшы бизәлешенә конкурста катнашуга гаризалар кабул итү башланды. Җиңүчеләрне эксперт жюри әгъзалары, шулай ук шәһәр халкы һәм кунаклары билгеләячәк. Конкурс турында тулырак мәгълүмат белән бүген «Татар-информ» мәгълүмат агентлыгында узган матбугат конференциясендә Туризмны үстерү комитеты директоры Дарья Санникова чыгыш ясады.

Җиңү өчен барлык милек рәвешләрендәге предприятиеләр һәм оешмалар, шәхси эшмәкәрләр көрәшә алачак. Алар конкурс эше сыйфатында капиталь объектны (керү төркеме, бина) яисә эчке интерьерны комплекслы рәвештә рәсмиләштергән туристлык өлкәсендә үз эшчәнлеген гамәлгә ашыра.

«Казан Яңа елга әзер» конкурсына ихтыяҗ бар. Беренче тапкыр ул былтыр узды. Әмма бу юлы без биналарның тышкы бизәлешендә тукталып калмаска булдык, ә шул исәптән, Яңа ел интерьерын да бәяләргә планлаштырабыз», - диде Д.Санникова.

Конкурс берничә номинациядә узачак: «Бинаның Яңа ел рухында иң яхшы бизәлеше - шәһәрлеләр сайлавы», «Бинаның Яңа ел рухында иң яхшы бизәлеше - эксперт жюри сайлавы», «Яңа ел рухында иң яхшы эчке бизәлеш - шәһәрлеләр сайлавы», «Яңа ел рухында иң яхшы эчке бизәлеш - эксперт жюри сайлавы».

Конкурсның беренче этабында катнашучылардан гаризалар кабул ителәчәк. Катнашу өчен tourism.kzn@tatar.ru электрон почтасына гаризаны 2021 елның 8-нче гыйнварына кадәр объектның яхшы сыйфаттагы фотосурәтен горизонталь ориентациядә, jpg форматында кимендә 2000 пиксель белән җибәрергә кирәк. Фоторәсемгә өстәмә рәвештә күрсәтелгән объектның исеме һәм адресы языла.

Яңа ел бизәлеше булган объектлар фотолары объектлар милекчеләре, бизәү авторлары, шулай ук шәһәр халкы яки кунаклары тарафыннан да җибәрелергә мөмкин.

15-нче гыйнвардан 5-нче февральгә кадәр конкурсның икенче этабы узачак - Казан шәһәре җирле үзидарә органнарының www.kzn.ru рәсми порталында тавыш бирү .

Бәйрәм бизәлеше буенча иң яхшы идеяләр gokazan.ru Instagram аккаунтында #НовогодняяКазань, #СhristmasKazan, #айдаКазань, #всевКазань, #КазаньГостеприимная, #WelcometoKazan, #KazanIsMuchMore хештеглары белән урнаштырылачак. Ә җиңүче, Туризм үсеше комитеты директоры сүзләренчә, Казан өстеннән һава шарында очу мөмкинлегенә ия булачак.

Конкурс үткәрү турындагы нигезләмәдә тагын да җентеклерәк мәгълүмат табарга була.

Исегезгә төшерәбез, узган ел конкурста катнашуга 60 гариза килгән иде.